Gaur bukatuko da Tilos 7 Pasa pala txapelketa: arratsaldeko 16:30etan hasita, lau finalak jokatuko dituzte, Tilosetan.
Bigarren mailakoa izango da aurrenekoa, Legarreta-Olazabal eta Josu-Alex bikoteekin. Partidu berdindua espero da, eta aurrean egon daiteke gakoa.
Segidan, 17:30etan, nesken finala izango da: Garazi Urdangarin eta Ekhiñe Balerdi iazko txapeldunak, Urien eta Otaegiren kontra. Aurrenekoek irabazi zuten beraien artekoa, ligaxkan.
18:30etan jokatuko da, lehenengo mailako finala: seigarren finala segidan izango du Aiheko Zubimendik, eta iaz galdutako txapela berreskuratu nahi du, Endika Ramosekin. Aurrean, bikote indartsua izango dute: Zabala eta Unda, makina bat txapela irabazitakoak, baina Tilos 7 Pasakoa falta dutenak.
Eta azkenik, 19:30etan jokatuko da maila herrikoiaren finala: Garmendia eta Elosegi hernaniar gazteak, Bidegain eta Izoztegi beteranoen kontra.
Ondoren, afaria egingo dute partehartzaile eta lagunek, Xalaparta elkartean, bukaera emateko. Txapelketaren arrakasta azpimarratu, eta eskerrak eman dizkiete antolatzaileek, partiduetara gerturatu diren zaleei, torneoaren babesleei, eta bolondres aritu diren epaileei.