Motz eta azkarra izan zen astearteko Plenoa, 2015-2019 legegintzaldiko azkena.
Aho batez onartu zen Musika Eskolako zuzendari eta idazkari postuetarako eskolako klaustroaren proposamena; Joxan Goikoetxeak jarraituko du zuzendari, eta Iñaki Eguren izango da idazkari. Berdin onartu zen, baita ere, udal ondasunen inbentarioa; 113.510.704,19 eurokoa da. Eta EH Bilduren aldeko eta gainontzekoen abstentzioarekin onartu zen 2018ko udal kontu orokorren inguruko kontu hartzailearen azken txostena.
Azkenik, 8 urteren ondoren kargua utziko duela eta, agurtu egin zen Luis Intxauspe alkatea: «Hernaniko aniztasun ideologikoa adierazten dugu. (...) Eskerrak eman nahi dizkizuet zinegotzi izan zaretenei eta hurrengo lau urtetan jarraituko duzuenei edo berriei. Hernani eta herniarren alde lanean jarraitzeko eskatu nahi dizuet; bakoitza beretik, bere ideologiatik, baina helburua beti Hernani eta hernaniarren bizitza hobetzea izanik. Niretzat plazer eta ohorea izan da. Orain, pozik, udalgintzatik herrigintzara pasako naiz».