Atzeratu egin dute, gaurko aurreikusita zegoen liburu aurkezpena. Berdintasun Kontseiluak eta Udal Berdintasun Arloak antolatuta, Samara Velte idazle eta kazetaria Biterin egotekoa zen gaur, 18:30etan, Manada auziari buruzko liburua aurkezten: Nik sinesten dizut: bortxaketaren kultura eta Sanferminetako kasua. Baina egilea gaixo dagoela eta, atzeratu egin dute.
Liburuan, 2016ko Sanferminetako gertakizuna aztertzen da; nola bost gizon atxilotu zituzten Iruñean, denen artean neska bat bortxatzea leporatuta. «Inor gutxi geratuko zen Manada delakoaren berri jakin gabe, azken hamarkadako mobilizazio haundienetako batzuk eragiteraino. Baina zerk bihurtu zuen gertakaria hain ikoniko?», dio idazleak. Auzia ikuspegi kritiko batetik aztertzen du Veltek. «Helburua da bortxaketaren kultura aletzea, ulertzea eta deszifratzea, aldatzeko».