Eguzki talde ekologistak, pasa den astean Hernanin «piztutako alarmaren» harira, azaldu du «Eusko Jaurlaritzaren Ingurumen Saila, Gipuzkoako zenbait eskualdetan behintzat, ez dela behar bezala zaintzen ari arnasten dugun airearen kalitatea». Ekainaren 4an, Nazioarteko Ingurumenaren Egunaren bezperan sinatu du oharra.
Ondorio horretara iristeko hainbat datu eman ditu, Gipuzkoan Airearen Kalitatea Kontrolatzeko Sareak dauzkan 18 estazio publikoen emaitzak kontuan hartuta, eta azaldu du datuetan akatsen bat badago, izango dela «Ingurumen Sailak herritarrei eskainitako informazioa akastuna» delako, «Informazoia Ingurumen Sailaren webgunetik hartu» duela eta.
«Beste herrietako estazioei ere errepaso txiki bat egin eta gabezia batzuk aurkitu ditugu»
Isuri kimikorik ez
Joan den astean «alarma guztiak piztu» ziren airearen kalitatea kontrolatzeko «Hernaniko anbulatorio ondoan dagoen estazioa, 1.336 mikrogramo sufre dioxido (SO2) neur-tzera iritsi zelako. Lau orduz SO2ren neurketak zeharo deskontrolatu ziren».
Horregatik salatu zuen egoera Eguzkik, eta «Jaurlaritzak oso modu epelean erantzun» duela dio, nahiz eta argitu duen «zenbaki horiek ez direla isuri kimiko baten ondorio, estazioaren neurgailuen matxura baten ondorio baizik». Horren aurrean, Eguzkik dio: «pozten gara isuri kimiko bat gertatu ez delako, baina, aldi berean, kezkagarria iruditzen zaigu Jaurlaritzak erreakzionatzeko erakutsi duen gaitasun eskasa. Azalpenak ere propio eskatu egin behar izan zaizkio».
«Gabezia» eta «utzikeria», estazioak errepasatuta
Hernanin gertatutakoa argituta, «beste herrietako estazioei ere errepaso txiki bat egin eta gabezia batzuk aurkitu» dituela ere salatu du Eguzkik, «baita nolabaiteko utzikeria ere».
Hernanin, hasteko, «PM 10eko neurgailuak (partikula txikiak) joan den uztailetik ez du funtzionatzen (...) SO2ko neurgailua ere ez dabil (...). Bestalde, estazio horrek, nahiz eta Hernaniko ?bolborategi kimikoa? zaintzen duen, ez du neurtzen PM 2,5 (are partikula txikiagoak), ez ozonoa, ez CO, ez CO2, ez bentzenoa, ez etilbentzenoa, ez toluenoa... ezta beste konposatuak ere».
Hernanikoaz gain, Usurbil edota Lasarte-Oriako estazioetan ere «gabeziak» aurkitu dituztela dio, edota Lezo, Beasain eta Zumarragakoan, eta gogorarazi du «erraustegia berehala martxan jarri nahi dutela kontuan hartuta, estazio horiek askoz hobeto ekipatuta egon behar luketela. Erraustegiaren kutsadura etengabe eta zorrotz kontrolatuko dutela agindu digute. Bada, Hernaniko kasuak agerian utzi du gaur egungo kontrola, behintzat, ez dela ez etengabea, ez zorrotza».