Erritu izeneko dantza ikuskizuna emango du Kukai dantza taldeak ekainaren 21ean Chillida Lekun, udako solstizioaren bueltan.
Sarrerak salgai jarri dituzte www.museochillidaleku.com webgunean eta Hernaniko turismo bulegoan; 20 eurotan helduentzat, 12 eurotan 18 urtetik beherakoentzat, eta doan, 8 urtetik beherakoentzat. Eguraldi txarragatik emanaldia bertan behera geratuz gero, atzeratu egingo da, baina sarrera berak balioko du, eta dirua berreskuratzeko aukera ere emango da.
Emanaldia, kanpoaldean
Ikuskizuna «bizitzako egoera desberdinetan barrenako bidaia bat da, erritu indibidual eta kolektiboen bitartez egiten dena, natura eta komunitatearekin etengabeko harremanean». Horregatik, «Eduardo Chillidak museoari atxikitzen zizkion printzioekin bat» datorrela diote antolatzaileek, eta «eszenatoki bikaina» izango dela.
Kanpoaldeko zelaian izango da emanaldia, eta belarretan eseritzeko manta edo toailak eramateko gomendatu dute.
Autobusak, Hernaniraino
Museoa irekita egongo da 20:15etatik, eta autobusean joateko gomendatu dute, edo Galarretan aparkatzeko. Autobusak jarriko dira Galarretatik museoraino, eta bueltan, Udalak Hernaniraino ere jarriko ditu.