Ilusioz gainezka joan ziren Zubietara, larunbat arratsaldean, Mundarroko neska kadeteak eta makina bat zale astigartar, harmailak bete zituztenak. Kopako finala zeukaten jokoan, Aloña Mendiren kontra, eta sekulako beroarekin, ezin izan zuten garaipena lortu (0-1).
Baina, hala ere, bizitako guztiagatik eta lortutakoagatik, ederki ospatu zuten bigarren postu hori, astigartar guztiek; irabazi balute bezainbeste, ia.
Partidu berdindua izan zen, eta Aloña Mendiren beterania eta indarrari, lanarekin, jokoarekin eta borrokarekin erantzun zioten astigartarrek. Baina Aloña Mendi aurreratu zen, lehenengo zatian, kontraeraso bati esker. Bigarren zatian, gainera, nekea nabaritu zuten moreek, eta gogotik saiatu arren, ezin izan zuten partidua berdindu.
Edozein kasutan, «taldearen ibilbide laburrean lortu dutena» goraipatu die Mundarrok, neska kadeteei. Hurrengo erronka, Donosti Cup torneoa.