Ekainarekin batera Hernani jaietan murgildu da burubelarri. Osiñagako festak atzo amaitu ziren giro ezin hobean. Agian bero gehiegi egin du, baina atzo eguzkiaren indarra zerbait baretu zen eta bigarren egunez jarraian jendetza bildu zen Arriatsu inguruan. Goizean pelota partidu ederrak eskaini zituzten gazteek eta Master Cupeko lau pelotarik.
Tolosa ahizpak girotu zuten, bitartean, goiza beraien trikiti doinuekin eta ondoren Aitor Mendiluze eta Agin Laburu bertsolariak aritu ziren bertsotan indarrak hartu aurretik bazkari oparo batekin. Arratsaldean, zaldi desaioaren momentua iritsi zen. Apustua bukatzearekin batera, bigarren saio bat ere eskainiko zuten bertsolariek.
Mendekosteak, San Antonioak eta San Joanak ekainean zehar
Behin Osiñagakoak amaituta Florida Auzoko Mendekosteek hartuko dute erreleboa edo lekukoa ostiraletik aurrera. Txupinazioak emango die hasiera festei, arratsaldez, umeentzako jolas eta buruhandiekin batera. Eta gauean nagusien danborrada egingo da. Ondoren, larunbatean eta igandean luzatuko dira festak. Eta geldiunerik gabe ondoren Ereñotzuko San Antonioak eta San Joanak etorriko dira hilabetea amaitzeko. Festa zaleek badute aukera.