Osiñagako festak giro ezin hobean hasi dituzte. Eguzkiak gogor jotzen zuen, baina betaurrekoekin eta manga motzean jende asko hurbildu zen Elorrabira; alde batetik zubiaren inaugurazioa ikustera eta bestetik festen hasieraz gozatzera. Festaz blai kalejira, bertsolariak, arrauna, zinta mozketa, poemak, trikitilari entzutetsuak.... handia izan zen Elorrabiko zubiaren inaugurazioa. Merezitakoa.
Arratsaldean festak ez zuen etenik izan. Tragoen beharra bazegoen 30 graduei aurre egiteko. Honela, sagardo dastaketak inoiz baino arrakasta gehiago izan zuen. Herri kirolariek majo sufritu zuten. Eskerrak sagardo dastaketa ondoren zen eta ederki errekuperatzeko parada izan zuten aritutako neska mutilek. Musika ere ez zen falta izan Laiotzekin.
Gaur pelota, bertsolariak eta zaldi desafioa
Gaurko eguna, berriz, Arriatsu eskolako frontoian hasiko dute auzotarrek. Goizeko 11:00etatik aurrera, gazteen arteko pelota partiduak izango dira aurrena, eta maila haundiko lau pelotari nesken arteko lehia izango da gero.
Aitor Mendiluzek eta Agin Laburuk jarriko dute saltsa auzoan, ondoren egingo duten bazkari herrikoia girotzen joateko. Arratsaldean, zaldi dema egingo dute. Desafioa bukatzen denean, bigarren saio bat ere eskainiko dute bertsolariek. Eta dantzan agurtuko dituzte aurtengo jaiak, Osiñagan.
GAUR, igandea
11:00, Gazteen pelota partiduak.
12:00, Master Cup txapelketako bikoteen arteko partidua: Maria Granado-Alaitz Badiola/ Araitz Eizagirre-Naroa Elizalde.
13:30ak arte, Tolosa ahizpak, trikitixa jotzen.
13:30, Bertsolariak: Aitor Mendiluze eta Agin Laburu.
14:00, Bazkari herrikoia.
18:00, Desafioa: Asteasuko Andoni Mendizabalen zaldiaren eta Zumaiako Juan Etxetxoren zaldiaren artean.
Ondoren, Aitor Mendiluze eta Agin Labururen bertso saioa.
Segidan, Dantzaldia, Joxe Angel El Navarrorekin.