Zita garrantzitsuak dauzkate palista hernaniarrek, asteburu honetan; eta horietako bitan, txapelaren bila ariko dira.
Gaur izango da aurrenekoa, Sestaon. Euskal Jokoetan, azkeneko partidua jokatuko du infantil mailako hirukote hernaniarrak: Maddi Iriondok, Joana Tolaretxipik eta Alaitz Barrenetxeak. Goizeko 10:30etan ariko dira, Arabaren kontra; eta irabazten duenak, eskuratuko ditu txapelak.
Eta asteburuko beste txapela, Garazi Urdangarinek lortu dezake. Oiartzungo Txapelketaren finala jokatuko du bihar, Madalensoro frontoian, goizeko 08:00etan hasiko den jaialdiko bigarren partiduan. Nahia Eizmendirekin ariko da, Agirre eta Erasunen kontra.
Trinkete txapelketetan, Iruran eta Mendillorrin zita
Trinketean ere izango dituzte bi zita, palista hernaniarrek. Batetik, Estatuko Trinkete Txapelketan, ligaxkako azkeneko jardunaldia jokatuko dute, nagusi mailan. Gaur daukate partidua Maider Huizik eta Ariane Arrietak, goizeko 09:00etan Mendillorriko frontoian, Mendillorriko B taldearen. Ligaxkako partidu guztiak irabazi ditu Hernanik, eta beraz, datorren astetik aurrera, hurrengo fasean ariko da.
Eta Euskal Herriko Trinkete Txapelketan ere jokatuko dute, bihar, 11:00etan Iruran, Societe Nautiqueren kontra.
Amaia Irazustabarrenak, bi partidu gaur
Gainerakoan, bi partidu jokatuko ditu Amaia Irazustabarrenak, gaur bertan. Eguerdiko 12:30etan Aretxabaletan ariko da Kirolez Busti jaialdian, Maddi Mendizabalekin, Irati Otaegi eta Itxaso Erasoren aurka. Arratsaldean, Bilbon ariko da hernaniarra, Bizkaiako Nazioarteko Openean, larruzko paletarekin. Laugarren jardunaldiko partidua izango du, Bizkaia frontoian, 18:00etan. Arrillagarekin ariko da, Isasmendi eta Ruiz de Azuaren kontra.