Urtero ospatzen dute Gipuzkoako Eskola Txikien Festa, 26 herri edo auzo txikietako batean; eta aurtengoan, Aginagan jarri dute zita, datorren igandean, ekainaren 9an. 32garren edizioa izango du festak, eta bertaratzera gonbidatu dituzte, «eskola txikien aldarrikapenarekin bat egin nahi duten guztiak». Egun osoko egitaraua prestatu dute.
Antolatzaileek nabarmendu dute, «herri txikientzat garrantzitsuak eta estrategikoak» direla eskola txikiak, bizia ematen dielako. Horregatik, elkartuko dira «Eskola Txikien Komunitatea osatzen dugun herritar zein auzokideak, festa giroan, eskola herrian edo auzoan izateak duen garrantzia aldarrikatzeko». Gipuzkoako Eskola Txikien Komunitate horren parte da, hain justu, Ereñotzuko Txirrita Eskola ere.
Leire Salaberria Aginagako Eskolako zuzendariak, azaldu du eskola txikiak direla «gertukoak, atseginak, erosoak, herri eta auzoekin lotuta daudenak... Guztion eskolak eta denontzat irekita daudenak». Eta nabarmendu du, haurrak izango direla, ekainaren 9an, «festa eguneko protagonistak».
GIPUZKOAKO ESKOLA TXIKIEN FESTA
EKAINAK 9, igandea
10:00, Txistulariak.
10:30, Harrera ekitaldia.
11:15, Jokuak, gune guztietan.
13:00, Yolanda Arrieta ipuin kontalaria. 2-5 urte bitartekoentzat, Ludotekan.
14:00, Bazkaria.
15:00, Mustaren Perkusio Tailerra.
15:00, Puzgarriak.
15:30, Lopene eta bere animaliak.
16:30, Sardiña Freskue antzerkia.
18:00, Apar festa.