«Jendeak udaran Urumea ibaiaren bazterrari ematen dion trataerarekin nekatu xamar», ibaia garbitzeko auzolana antolatu dute gaurko, bai Aranon eta bai Goizuetan.
Goizuetan, goizeko 09:00etan jarri dute elkartzeko zita, herriko plazan. Hiru orduz ariko dira, 12:00etara arte, eta edonork hartu dezake parte, baina aurrez izena eman zutenek (atzo arte zen epea), asegurua ere izanen dute. Guztientzat, eskularruak, poltsak eta pintzak jarriko dituzte, eta arropa egokia eramatea gomendatu dute, botak eta euritarako xira barne. Bukaeran, hamaiketakoa eskainiko diete, boluntario guztiei.
Goizuetako Udalak antolatu du gaurko auzolan saioa, Life eta Irekibairen laguntza eta finantziazioarekin.
Garbiketa, bazkaria eta jolasak Abañon, aranoarrek
Ordubete beranduago jarri dute hitzordua, aranoarrek. Goizeko 10:00etan bilduko dira Abañon, eta bertan eginen dute, Urumea ibaiaren garbiketa.
Kasu honetan, herritarren ekimena izan da, eta Aranoko Udalak eta Nafarroako Ingurumen Sailak lagundu dute. Antolakuntzak jarriko du, garbiketarako beharrezko materiala. Boluntarioei gomendatu diete, oinetako erosoak eramatea.
Baina lanerako bakarrik ez, aisialdirako tartea ere izanen dute, Abañon. Izan ere, auzolanaren ondoren, bazkaria eginen dute bertan. Elkarrekin bazkalduko dute denek, norberak etxetik eramandakoarekin; baina postrea jarriko dute antolatzaileek, denentzat. Eta bazkalondoren, talde jolasetan ere ariko dira denak.
Auzolanean parte hartzeko, hori bai, aurrez eman behar zen izena, ostegunera arte.