Ekainaren 6an tailerra emango da doan, 18:30etan udaletxeko pleno aretoan, etxebizitzetan energia aurrezteko aholkuak emateko. Aldundiko Ingurumen eta Obra Hidraulikoetako Departamentuarekin elkarlanean antolatu du tailerra Udalak, Gipuzkoa Argitu programaren barruan.
Energiaren kontsumoa gutxitu eta osasunean irabazi
Etxebizitzetan hainbat aldaketa eta obra eginda, energiaren kontsumoan aurreztu daitekeela ikasteko aukera emango da tailerrean. Era berean, horrek osasunean eragin positiboa duela ikusaraziko da.
Hain zuzen, etxebizitzak birgaitzeko energia-eraginkortasunarekin zerikusia duten irizpideak kontuan hartzeko aholkatuko da. Hau da, etxeetan isolamenduak, hermetikotasunak, aireztapena edota bestelako instalakuntzen eraginkortasuna hobetuta, energiaren kontsumoa, eta beraz, dirua aurreztu daitekeela erakutsiko da. Horrekin, hezetasunak hobeto kontrolatzen dira, adibidez, eta beraz, hainbat gaixotasun saihestu daitezke.
Doaneko tailerrean parte hartzeko, izena eman beharra
Tailerra doan izango bada ere, aurretik izena eman behar da. Ekainaren 4a izango da horretarako azken eguna. Telefonoz, 943 33 52 41 zenbakian egin daiteke, edo emailez, it.ingurugiro@astigarraga.eus helbidean.
Informazio gehiagorako, berriz, www.gipuzkoaingurumena.eus/eu/argitu webgunea begiratu daiteke.
Hurrengoa, udazkenean
Ekaineko tailer hau ez da izango bakarra, Gipuzkoa Argitu programaren barruan antolatuko dena. Udazken aldean, beste bat egingo da, etxean energia berriztagarriak nola erabili edota instalatu erakusteko.