Pasa den astean, maiatzaren 23an abiatu ziren Hernani Errugbi Elkarteko kideak San Petesburgora; Zazpiko Errugbiko Europako Txapelketa jokatuko zuten 12 jokalariak eta elkarteko laguntzaileak. Astelehenarekin itzuli dira, laugarren postua lortuta. Iaz, seigarren izan ziren, eta, zuzendaritzaren arabera, «iaz baino irudi hobea eman» dute aurten, eta «prestakuntza hobea» nabaria izan da. Aldatu ez dena izan da, hernaniarrek daukaten azkenera arte borrokatzeko grina.
Borrokan gogor aritu den beste hernaniarra Igone Martin Lujanbio izan da. Aurreneko aldiz egin da emakumezkoen txapelketa, eta bertan Euskadiko Selekzioarekin jokatu du.
Txapeldunari irabazi
Osteguna bidaiarako eguna izan zuten, eta ostiralean entrenatzeko eta kontzentratzeko tartea izan zuten jokalariek. Partiduak, larunbata eta igandearekin jokatu zituzten.
Txapelketan parte hartuko zuten 12 taldeak hiru multzotan zeuden sailkatuta, eta, beraz, aurreneko sailkapenerako lehian, hiru partidu jokatu zituen Hernanik, multzoko taldeen kontra, eta baita hirurak irabazi ere: Dukla (Txekiar Errepublika) eta Södertälje (Suedia) taldeen kontra «nahiko erraz»; nahiz eta iaz Duklak irabazi zion Hernaniri; VV Mosku errusiarrari, berriz, «juxtu, ondo borrokatu ondoren». Partidua hasi eta berehala 7 eta 0 galtzen hasi ziren hernaniarrak, baina bi entsegu egin eta garaipena lortu zuten. «Gure taldea oso kontzentratua aritu zen. Aurreneko aldia izan da errusiar bati irabazi dioguna, eta gero, beraiek izan dira txapeldunak».
Hain zuzen, VV Mosku izan da txapelketako irabazlea. Igandearekin jokatu ziren final erdiak eta finala. Aurrena, Hernanik beste multzoko hirugarrenaren kontra jokatu zuen: Suitzako Grasshopper taldearen kontra. «Gure nagusitasuna nabarmendu zen, 28 eta 5 irabazi baikenuen nahiko erraz, eta final erdietarako sailkatu».
Final txikiak, ihes
Final erdietarako sailkatu ziren, Hernanirekin batera, VV Mosku eta Narvskaya Zastava errusiarrak eta Lituaniako Baltrex-Siauliai. «Sorpresa izan zen Samurai talde ingelesa ez sailkatu izana, zazpiko errugbian ohituta baitaude jokalari asko, eta faborito ziren. Baita Froggies frantsesa ez sailkatzea ere».
Sailkatutako gainerakoak ere oso indartsuak ziren, ordea. Baltrexen aurka galdu egin zuen final erdia Hernanik, 12-21. «Tentsio haundiarekin atera ziren jokalariak, eta hasieratik oso gogor atera zen talde lituaniarra. Bi entsegu egin zituzten, eta ezin izan genion horri buelta eman, guk ere bi entsegu egin arren». Hori horrela, finaletik kanpo geratu zen Hernani, eta hiru eta laugarren postuen arteko lehiarako prestatu zen.
Bi talde errusiarren arteko derbian, San Petesburgo bertako Narvaskaya Zastavak galdu zuen, eta beraz, finalean, Mosku eta Lituaniako Baltrex aritu ziren aurrez aurre, eta errusiarrak izan ziren garaile. Narvaskaya Zastava Hernaniren aurka aritu zen hiru eta laugarren postuak finkatzeko lehian, eta 19 eta 10 irabazi zuen, hirugarren postua eskuratuz. «Etxekoak ziren eta presio haundia egin zuten. Giro ikaragarria jarri zuten txarangekin, animatzaileekin... Ilusioa genuen ?final txikia? irabazi eta hirugarren geratzekoa, azken partidu hori irabazita. Baina etxekoak gailendu ziren».
«Ilusioa genuen ?final txikia? irabazi eta hirugarren geratzekoa, azken partidua irabazita»
Euskadiko Selekzioak helburua beteta
Igone Martin Lujanbio hernaniarra, berriz, Euskadiko Selekzioarekin aritu zen beste hiru talderen kontra: Neva-Leader (Errusia), LSPA/Livonia (Lituania) eta Gerogian Ladies (Georgia). Azken hauen kontra aritu zen aurreneko partiduan, eta irabazi egin zuen, 12 eta 10. Baina galdu egin zuen letoniarren kontra eta errusiarren kontra. Gauzak horrela, 3 eta 4 postuetarako Georgia izan zuen berriro aurkari, eta galdu egin zuen.
«Aurreneko aldia da emakumezkoen txapelketa antolatzen dela. Euskadik aurrenekoz jokatu du, eta talde gaztea da. Entrenatzailearen helburua zen partidu bat irabaztea, eta nahiko ondo jokatu dute. Taldea egiten ari da».
«Talde errusiarren kontrako partiduetan gainera etortzen da beti, harmaila»
Hernaniko jokalariak gustura itzuli dira, Errusiatik, eta lanean segi beharko dute batzuek, asteburu honetan ere. Izan ere, Euskadiko Selekzioarekin Amsterdamen dira, zazpiko errugbiko torneoan, 100 talde ingururen kontra lehiatzen, Igor Genua, Beñat Arizeta, Mikel Bidegaray, Erik Goñi eta Mikel Perez.
Errusiako esperientziak lagunduko die, seguru. Jokalarien esanetan, «aurten gehiago entrenatu» dute zazpikoan, eta «zelaian nabaritu da». Era berean, Genuaren esperientzia ere lagungarri zaiela diote. «Aurreko urtean selekzioarekin zegoen, eta aurten plus haundia izan da. Zelaian argiago dauka zer eta nola egin».
Nekea nabaritu dute, hala ere. «Ez gaude ohituta bi egun jarraian jolastera». Baita errusiarren indarra ere; eta ez bakarrik, jokalariena! «Talde errusiarren kontrako partiduetan gainera etortzen da beti, harmaila. Bigarren egunean gehiago eragin zigun, hala ere; aurrenekoan irabazi egin genien!». Jokalariak ere ez dira nolanahikoak. «Bielorrusiarrak indartsuak dira. Txekiarrak, altuak eta indartsuak. Gu txikiagoak gara, eta biziagoak, agian».
Garagardo Azoka, Estatuko Txapelketa eta Errugbi Barneratzaile Txapelketa, datozen hitzorduak
Errusiatik bueltatuta, lanean jarraitu beharra daukate, oraindik. Bost jokalari Amsterdamen dira, eta gainontzekoak, datorren astean, ostegunetik igandera egingo den Garagardo Azoka prestatzen. Tartean, gainera, hilaren 8an, Errugbi Barneratzaile Txapelketa jokatuko da Hernanin. Eta Hernanitik kanpo, datozen bi asteburuetan, Estatuko Zazpiko Txapelketa ere jokatu beharko dute aurreneko taldekoek.
Denboraldiko azken indarrak bilduko dituzte, beraz. Baina, dagoeneko, pozik. «Sentsazioa izan da partidu gehien jokatu dugun urtea izan dela. Aurten azken minutura arte borrokatu dugu, eta emaitzak ere hor daude. Eta lanean segitzeko prest gaude! Gazteen falta badugu, hala ere, baina badatoz pixkanaka».
Zazpiko Errugbiko Europako Txapelketan aritutako jokalariak
- Anartz Elosegi
- Kepa Mijangos
- Mikel Bidegaray
- Mikel Perez
- Mikel Imaz
- Erik Goñi
- David Pelaz
- Igor Genua
- Igor Etxeberria
- Oier Pardo
- Beñat Arizeta
- Mattin Collado