Fase erabakigarrian sartu da, Gipuzkoako Lau t?erdiko Txapelketa; eta partidu garrantzitsuak izango dituzte, esku pelotari hernaniar eta astigartarrek, asteburu honetan.
Nagusietan, bi hernaniarrek daukate zita, final zortzirenekin: Iñigo Labakak Altzon jokatuko du bihar, 12:00etan, Intxurreko Aizpitarteren kontra; eta Iñigo Urkizuk ere bihar, 17:30etan Hernanin, Tolosako Saralegiren kontra.
Jubenilen artean, berriz, Xabier Salaberria hernaniarra ariko da, Hernanin bertan bera ere, 17:00etan hasita. Tolosako Amiano izango du aurrean, semifinalaren bila.
Kadeteetan, bost partidu
Eta kadeteetan, azkenik, bailarako bost pelotarik daukate hitzordua, final zortzirenekin. Eñaut Lizeaga astigartarrak, Tolosan jokatuko du gaur, arratsaldeko 16:00etan, Amiano tolosarraren kontra. Eta Tolosan ariko da Unai Albeniz hernaniarra ere, 17:00etan, Amundarainen kontra. Ekain Lizeaga astigartarra, berriz, Astigarragan ariko da bihar, 11:00etan, Ilunpeko Labakaren kontra. Eta Hernanin jokatuko dute, beste bi hernaniarrek: Mattin Arluziagak 16:00etan, Behar Zanako Aranbururen kontra; eta Unax Uitzik 16:30etan, Oiarpeko Etxeberriaren kontra.