Zita garrantzitsua dauka gaur, Naia Mangas txirrindulari hernaniarrak. Izan ere, Euskadiko Txapelketak jokatuko dira goizean, Ugaon; eta kadete mailakoan ariko da bera. Abiatzen aurrenekoak izango dira, goizeko 09:00etan; eta ondoren abiatuko dira, 11:00etan, juniorrak, 23 urtez azpikoak eta elite mailakoak.
Kadeteen kasuan, 46 kilometrokoa izango da ibilbidea, Ugaon hasi eta bukatuta, eta bi aldiz igo beharko dute Sarasola mendatea; azkeneko aldiz, helmugatik 12 kilometrora.
70 bat txirrindulari ariko dira, kadete mailako proban. Eta beste 90 partehartzaile inguru izango dira, gainerako hiru kategorietan.
Mutil jubenilek, bi etapa Idiazabalen, egun berean
Gaur daukate zita, mutil jubenilek ere. Eta beraiena, ez da ohiko lasterketa izango: bi etapa egingo dituzte egun berean, ia bata bestearen segidan. Idiazabalen ariko dira, arratsaldean, Idiazabal Saria lehiatzen. Aurrena, 15:00etan hasita, 53 kilometroko etapa izango dute, helmugatik 7,5 kilometrora Liernia mendatea igota. Eta ondoren, 17:30etan, bakarkako erlojupeko laburra izango dute, 4 kilometrokoa.
Mutil kadeteak, berriz, Zumaian ariko dira, gaur goizean. 10:30etan abiatuta, 57 kilometroko ibilbidea osatuko dute.
Infantil eta alebinek, mendi bizikleta proba Irunen, eta errepidekoa Anoetan
Eta gaztetxoenek, azkenik, bi proba ezberdin izango dituzte, gaur bertan. Batetik, mendiko bizikletarekin ariko dira, Irunen, 16:30etan hasita. Eta bestetik, ordu berean, errepideko proba izango dute Anoetan.