Asteburu borobila izan da joan dena, pelotari hernaniar eta astigartarrentzat, Herriarteko Txapelketan. Izan ere, txapelketan jarraitzen duten hiru taldeek lortu dute garaipena.
Horrela, eskuzko lehian, aurrera egin dute Astigarragak eta Hernanik, eta final laurdenetara sailkatu dira.
Astigartarrek, Oiartzunera jo zuten ostiralean, 2-1eko abantaila defendatzera; eta beste bi garaipen lortu zituzten. Eñaut eta Ekain Lizeaga anaiek 22-12 irabazi zuten aurrena; Manex Aldalur eta Aimar Mujika jubenilek porrota jaso zuten (5-22); baina pasea ziurtatu zuten Harri Loidi eta Jokin Santxez nagusiek, 22-15 irabazita. Orain, Zestoaren kontra ariko dira, final laurdenetan. Joanekoa, ostiral honetan Txomiñenen.
Berdintsu aritu zen Hernani ere, Adunaren kontra. Kanpoan 2-1 nagusitu ondoren, primeran eutsi zion errenta horri, etxean, joan den ostiralean. Partidu haundia jokatuta, 22-7 nagusitu ziren Xabier Apaolaza eta Unai Etxarri kadeteak; eta kanporaketa erabakita utzi zuten Xabier Salaberria eta Oihan Zugasti jubenilek, 22-16 irabazita, aurreko asteko porrotari buelta emanez. Eta ezer jokatu gabe, galdu egin zuten Iñigo Urkizuk eta Ekaitz Insaustik, nagusietan (17-22); ez zuen bere ohiko mailan jokatu, bikote hernaniarrak. Final laurdenetan, Azpeitiaren kontra ariko da Hernani, eta ostiralean jokatuko du joanekoa, han. Pelota Elkarteak autobusa antolatuko du, pelotariak animatzera joateko, Atsegindegitik 20:30etan abiatuta.
Final laurdenetan, Zestoa du kontrario Astigarragak, eta Azpeitia Hernanik, ostiralean hasita.
Andoainen aurreneko pausoa palistek, semifinaletara
Eta esku pelotariek aste honetan hasiko badituzte final laurdenak, dagoeneko ekin diote fase horri, palistek; baita ondo ekin ere. Andoainen jokatu zuen Hernanik, joanekoa, bertako taldearen kontra; eta hiru partiduetatik, bi irabazi zituzten hernaniarrek.
Buruz buru, Lujanbiok 20-12 irabazi zuen, frontoi osoan. Binaka, 20-8 nagusitu ziren Manterola eta Zubimendi. Eta banaka zazpi barruan, 12-20 galdu zuen Urreagak. Aurreneko pausoa eman dute, beraz, semifinaletara sailkatzeko.
Oiartzungo Txapelketaren finalean, Garazi Urdangarin
Txapelketa gehiagotan ere aritu dira palista hernaniarrak, joan den asteburuan. Oiartzungo Txapelketako semifinala jokatu zuen Garazi Urdangarinek larunbatean, Nahia Eizmendi aiarrarekin; eta irabazi egin zuten, Murua eta Galdosen kontra (25-14). Hori horrela, datorren igandeko finalean ariko dira, txapelaren bila.
Irabazi egin zuten, baita ere, Euskadiko Jokoetako partidua, Maddi Iriondok, Joana Tolaretxipik eta Alaitz Barrenetxeak. Bizkaiari nagusitu zitzaizkion larunbatean, Sestaon.
Eta garaipena lortu zuten, Amaia Irazustabarrenak eta Ariane Arrietak ere, Estatuko Trinkete Txapelketan, Oberena taldearen kontra. Aste honetan bukatuko dute ligaxka, eta hurrengo fasera sailkatuko dira hernaniarrak, partidu guztiak irabazi baitituzte.
Aldiz, porrota jaso zuten Garazi Urdangarinek eta Ekhiñe Balerdik, Euskal Herriko jubenil mailako trinketekoan, Adurtzaren kontra (20-30). Eta porrota jaso zuen Maider Huizik ere, Paleta Larruzko Txapelketaren hirugarren jardunaldian. Maizarekin batera, 2-3 galdu zuen Deban, Ibañez eta Etxaniz bikotearen aurrean.