Asfaltatze-kanpaina abiatuko du Udalak; horretarako, obra horiek kontratatzeko pleguak argitaratu berri ditu, eta eskaintzak jasotzeko epea irekita dago. Horiek aztertuta, esleipena egingo dute, eta asmoa da lanak udara aldean hastea. Lizitazioaren prezioa 536.985,56 eurokoa da, eta lanak burutzeko epea bi hilabetetakoa da.
Udalak ohar baten bidez azaldu bezala, planaren helburua da «herriko zenbait kale eta herri-bideetako zoladura berritzea edota birgaitzea. Eremu batzuetan zoladura osoa asfaltatuko da, eta beste batzuetan, aldiz, zatiak konponduko dira, puntu zehatzetan dauden arazoak konpontze aldera».
Erroilaburu bidea eta Osinaga bidea, tartean
Udalak konpondu nahi dituen herri-bideen artean daude, hain zuzen, Erroilaburu bidea eta Osinaga bidea.
Aurrenekoa, Martindegitik abiatzen den herri-bidea da. Telleri-Zahar baserriaren inguruan dagoen bidegurutzean hasiko dira lanak (1.000 metroko bidea). Bidegurutzeetako eta jabetza-sarreretako asfaltoa ere berrituko da, bertan. Gainera, bidegurutzearen inguruan, 110 metroko hormigoizko ubide berri bat eraikiko da.
Bigarrena, Osinaga bidea, Portu auzoan hasten da; bertako bidegurutzean hasiko dira lanak, eta Loidiko bidegurutzea pasa arte asfaltatuko da (1.300 metro). Zoladura berrituko da bai bidegurutzeetan, bide bazterretan, baita jabetza-sarreretan ere. Gainera, Mendipe baserriaren inguruan, maldak aztertuko dira euri-urak etxebizitzetara joan ez daitezen.
Abiadura moteltzeko koxkak aldatu, eta plastikozkoak jarriko ditu Udalak; baita ubide bat berritu eta Garbigunearen sarrera asfaltatu ere.
Beste hainbat lan, ere bai
Bestalde, hilerriko lurra ere asfaltatuko da, «kaleen irisgarritasuna bermatzeko eta mantenua errazteko», eta azaleko euri-uren bilketa bideratzeko ubide txikiak egingo dira.
Etxeberri auzoan ere auzoko zati haundi baten asfaltoa berrituko da.
Eta azalera txikiko beste hainbat lan ere egingo dira:?Lizeaga auzoko Arantzazu plazako zorua, Karobietako Iturregi kalea, eta hainbat kaleetan dauden zuloak ere bai (Txirrita, Zinkoenea, Zikuñaga Papelera, Akarregi industrialdea, Sagastialde eta Portun).
Lan-baldintzen klausula
Udalak adierazi duenez, pleguetan jasotzen diren baldintzen artean dago lan-baldintzena: «lanak exekutatuko dituen enpresak errespetatu beharko ditu hitzarmen sektorialean jasotzen diren lan-baldintzak».