Dagoeneko eman du aditzera Hernaniko Udalak, zein izango diren hautagaiak, 2018-2019 denboraldiko Hernaniko Kirol Sariak jasotzeko. Eta aurten, bost hautagai izendatu dituzte, hiru sarietarako.
Emakumezkoen Kirol Saria jasotzeko bi hautagaiak dira, Alazne Egiazabal arraunlaria eta Maider Altuna belar hockey jokalaria. Egiazabalek, 11 bandera lortu ditu, Pasai San Juaneko Batelerak traineruarekin; horietako zortzi titular bezala, eta beste hiru ordezko gisa. Eta Altuna, izan zen iaz Iberdrola Ligako txapeldun, Final Fourreko jokalari onena eta gol gehien sartu zituena, eta Ligako bigarren jokalari onena (entrenatzaileek bozkatuta).
Gizonezkoen Kirol Sarian, berriz, Aitor Urkia atleta eta Aitor Gorrotxategi pelotaria dira hautagai. Urkiak, Euskadiko junior mailako errekorra bota zuen maiatzean, bigarren dago Espainia mailan, eta bi aldiz aritu da nazioartean lehiatzen: Portugaleko Nazioarteko Topaketan; eta Tampereko junior mailako Munduko Txapelketan, Finlandian.
Eta azkenik, Kirol Ibilbideari Saria jasotzeko, bakarra da hautagaia: Jose Manuel Otxotorena ereñotzuarra, futboleko atezain ohia eta entrenatzailea. Real Madrid, Valencia, Tenerife, Logroñes eta Racing taldeetan, eta Espainiako selekzioan jokatu zuen Otxotorenak; eta gerora, atezainen entrenatzaile izan da, Valencian, Liverpoolen eta Espainiako selekzioan. Bere palmaresean dauzka, Espainiako hiru liga eta kopa bat, UEFAko bi kopa, eta 1989ko ligan gol gutxien jaso zituen atezainari Zamora Saria.
Bozkatzeko aukera, ekainaren 4ra arte
Hernaniko kirol elkarteek proposatu dituzte bost hautagaiak, eta orain, herritarrek aukeratuko dute, horien artean, zeini emango dizkioten hiru sariak. Dagoeneko zabalik dago bozkatzeko epea: ekainaren 4an bukatuko da, eguerdiko 12:00etan. 16 urtetik gorakoek bozkatu dezakete, hiru bide hauetatik: kirola.hernani.eus web orrian, kiroldegian, edota Biterin.