Gipuzkoako Txapelketa irabazi ondoren, Euskadikoaren bila joango dira gaur, Sestaora, Hernaniko neska infantilak: Maddi Iriondo, Joana Tolaretxipi eta Alaitz Barrenetxea.
Probintziako txapeldun gisa, Gipuzkoa ordezkatuko du hirukoteak. Bizkaiaren kontra jokatuko dute, eguerdiko 12:00etan.
Garazi Urdangarinek, semifinala Oiartzunen
Oiartzunen ariko da, bestalde, Garazi Urdangarin hernaniarra. Oiartzungo Txapelketa jokatzen ari da, Aiako Nahia Eizmendirekin batera, eta semifinaletan dira dagoeneko. Gaur jokatuko dute, finalerako pasearen bila, arratsaldeko 16:00etan. Kontrarioak, atzoko partiduen ondoren ziren jakitekoak. Litekeena da, Larrarte eta Karrera izatea.
Bihar, berriz, Euskal Herriko trinkete txapelketan ariko dira, Hernaniko neska jubenilak. Adurtzaren kontra jokatuko dute, Irurako Ametsa trinketean, 11:00etan hasita.
Amaia Irazustabarrenak ezin, Frantziako Saubriguesen
Astean zehar jokatu du Amaia Irazustabarrenak, beste torneo bat. Espainiako selekzioak deituta, Maider Mendizabalekin aritu da, Frantziako Saubrigues herrian, 30 metroko frontoiko txapelketa jokatzen. Baina ezin izan dute beraien maila onena eman, Mundialetik ez baitute jokatu modalitate horretan; eta bi partiduak galdu dituzte, Frantzia eta Kubaren kontra.
Eta azkenik, Anoetako jaietako txapelketan ere ari dira bi bikote hernaniar, bigarren mailan. Aurreko astean, bina partidu jokatu zituzten: Eli Gutierrezek eta Eider Otaegik, galdu egin zuten Amaia eta Elenaren kontra (12-22); Ekhiñe Balerdik eta Garazi Urdangarinek irabazi Nahia eta Enarari (16-15); eta hernaniarren artekoan, Balerdi eta Urdangarin nagusitu ziren (23-13). Emaitzak ezberdinak dira beti, partiduak jokatzen direlako 20 minutu edo 30 tantora.