Inklusiorako urratsak ematen egitasmoaren barruan, zenbait ekintza antolatu ditu Hernani Errugbi Elkarteak, aste hauetan. Atzo izan zen aurrenekoa, Telmo Irureta aktoreak Kixkal tabernan eskaini zuen monologoa; eta beste bi ekintza ere badaude aurreikusita.
Horrela, datorren asteazkenean, kirol inklusiboen sentsibilizazio saioa egingo dute, Tilosetan. Arratsaldeko 18:00etan hasita, bertan izango dira Gipuzkoa mailan kirol inklusiboaren arloan lanean ari diren zenbait talde. Postu ezberdinak jarriko dituzte, «herritar guztiek elkarren artean jolasteko aukera izan dezaten».
Eta ekainaren 8an, azkenik, jokatuko dute Errugbi Inklusibo Txapelketa, hirugarrenez. Aurreratu dutenez, euskal taldeez gain, Estatutik ere etorriko dira, zenbait talde.