Gipuzkoako Liga irabazi zuten aurreko asteburuan, Hernaniko Boleibol Taldeko neska infantilek, hiru egunetan hiru partidu jokatu eta irabazita. Eta Gipuzkoako txapeldun bezala, Euskadiko Jokoetan ariko dira gaur, Arabako eta Bizkaiako txapeldunekin batera. Sestaon izango da hori, La Benedicta kiroldegian, eta hernaniarrek, helburu dute «ahalik eta jokorik onena egitea; horrekin, ziur emaitza onak ere etorriko direla», nabarmendu dute taldetik.
Arabako txapeldunaren kontra ariko dira aurrena, goizeko 10:30etan hasita. Eta segidan, Bizkaiako txapeldunari egingo diote aurre, 11:30etan.
Jubenilen finalak eta sariak, Pio Baroja kiroldegian bihar
Neska jubenilek ere, zita garrantzitsua daukate asteburu honetan. Izan ere, Gipuzkoako Ligaren azken fasea jokatuko dute, bihar, Donostiako Pio Baroja kiroldegian. Aurrena, semifinala jokatuko dute, 09:30etan hasita, Zarauzko Lizardiren kontra. Irabazita, finalean ariko dira; eta bestela, hirugarren posturako lehian ariko dira. Bihar bertan izango dira bi partidu horiek, 11:30etan.
Eta finalen ondoren, denboraldi osoan egindako lanaren saria, bihar jasoko dute, Hernaniko talde guztiek. Sari banaketa ekitaldia egingo dute Pio Barojan bertan, eta maila guztietako talde onenei egingo diete errekonozimendua.
Hernaniarren kasuan, posible da hiru taldeek jasotzea sari bana: neska infantilek, urrezko domina jasoko dute; neska kadeteek, zilarrezkoa; eta neska jubenilek, domina bat lortzeko aukera dute bihar.