Asteburu honetan jokatuko da, Benidormen (Valentzia), Espainiako Llaut Txapelketa. Eta bertan izango da, Hernani Arraun Elkarteko talde bat ere: neska absolutuek hartuko dute parte.
Gaurkoan, sailkatze estropada izango dute hernaniarrek, beste zortzi ontzirekin batera: Real Club Mediterráneo, Club de Rem Badalona, CD Universitario Polideportivo de Valencia, Club Náutico Campello, Club Náutico de Benidorm, Club Náutico Santa Pola, Real Club de Regatas de Alicante, eta Secció Esportiva Universidad d?Alacant.
Hortaz, euskal talde bakarra izango da hernaniarrena. Baina ez neska absolutuetan bakarrik; gainerako kategorietan ere, euskal ordezkari bakarra izango da Hernani.
Semifinalak eta finalak, bihar
Hiru txandatan ariko dira gaur, eta onenak, semifinaletara pasako dira. Bihar izango dira bi semifinalak, aurrena; eta bi finalak, ondoren: final haundia eta kontsolaziokoa.
Arraun elkarteak nabarmendu du, «gogor» entrenatu dutela neska absolutuek, zita honetara begira; eta «ilusioarekin eta dena emateko prest» joan direla Benidormera.
Duela bi urte ere hartu zuten parte Espainiako Llaut Txapelketan, Hernaniko neska absolutuek; eta emaitza bikaina lortu zuten: hirugarren postuan bukatu zuten. Hortaz, orain ere onenen artean egon nahi dute, final haundira sailkatu eta garaipena lehiatzeko.