Asteazkenean egin zuen legegintzaldiko azkeneko Plenoa, ezohikoa, Astigarragako Udalak. Eta landutako puntu guztiak onartu ziren, batzuk aho batez, besteak berdinketarekin. Baina batzuetan, eztabaida izan zen.
Bereziki, bi puntuk eragin zuten ika-mika. Aurrena, ibai parkeko lurrak doan jasotzeari buruz aritu ziren, Britac Proyectos S.L. enpresak Udalari emanda. Alde bozkatu zuen EAJk, eta abstenitu egin zen EH Bildu; PSE-EEko zinegotzia ez zen Plenoan izan. Andoni Gartzia EH Bilduko bozeramaileak, salatu zuen «eskandalu baten azkeneko pausoa» zela hori: «hasierako hitzarmenetik oraingora, 1,5 milioi euro galdu ditu Udalak; kontuhartzaileari eskatuko diogu, galera horri buruzko azterketa bat egitea». Zorione Etxezarraga alkateak erantzun zion, diferentzia horren zati bat dela, hasieran gainaldeko pasabidea egin behar zutela, enpresaren kontura joango zena; «baina azkenean ez da beharrezkoa, ADIFekin egingo baitu». Gartziak adierazi zuen, «herritarrentzako onura» izan behar zirela 1,5 milioi euro horiek.
Eta beste eztabaidagai nagusia, izan zen Udalak, Bidegik eta Astigarraga Lantzen S.A. sozietate publikoak sinatuko duten hitzarmena. Horren arabera, elkarrekin bideratuko dute edateko ur sarea, Garraio Hirira eta Zarkumendegi poligonora, gastuak konpartituz.
Andoni Gartziak galdetu zuen: «esan duzue, bakoitzak bere aldetik eginez gero, gastuak bikoiztuko liratekeela. Zenbat aurreztu du Bidegik eta zenbat Udalak? Horrelako proiektu bat inposatu behar badigute, herritarrei ezertxo ere informatu gabe, gutxienez beraiek ordaindu zezaketen dena». Alkateak erantzun zion, «berdin-berdin» egin behar zuela Udalak obra hori, eta «aukera ona» iruditu zitzaiela elkarrekin egitea: «beraiek estimazio bat egina zeukaten, eta horren arabera ordainduko digute». Azkenean, EAJk alde eta EH Bilduk kontra bozkatuta, alkatearen kalitatezko botoak erabaki zuen.
Bost puntu, aho batez
Gainerakoen artean, aho batez onartu ziren, gai-ordeneko bost puntu: soldatak uztailetik %0,25 igotzea, Barne Produktu Gordinaren igoera %2,5 baino haundiagoa izan zelako 2018an; Foru Aldundiarekin hitzarmena sinatzea, mendekotasuneko prestazio ekonomikoa jasotzen duten herritarrek jasotako zaintzaren kalitatearen jarraipena egiteko; lankidetza-hitzarmen berria sinatzea, Buruntzaldean bazterkeriako arrisku egoeran dauden pertsonentzat tutoretzapeko etxebizitza zerbitzua emateko; etxez etxeko laguntza zerbitzuaren kontrataziorako pleguak erabiltzea, lizitazioa berriro ateratzeko, hutsik geratu dela eta; eta babestutako etxebizitzetako erabiltzaileentzat laguntza zerbitzua emateko, lehiaketaren pleguak onartzea.
Aho batez onartu ez zen beste puntua, izan zen kreditu aldaketa bat egiteari buruzkoa. Izan ere, alegazio bana aurkeztu zuten udal idazkariak eta EH Bilduk, eta bigarrena ez zen onartu: eskatzen zuen, DBHrentzako partzela hiritartzeko adinako partida bat jasotzea; eta Dastatzenek Udalarekin daukan zorra kitatzeko, enpresak Bidebitarten daukan pabilioia erabiltzen uztea doan, Brigadarentzako izan dadin.
Alkatearen kalitatezko botoari esker onartu zen, EH Bilduren alegazioa atzera bota eta kreditu aldaketa egitea.