Trio Zukan hirukoteko kideetako bat da Jon Ansorena txistulari hernaniarra, Maria Zubimendi akordeoi-jole zumaiarrarekin eta Gorka Catediano perkusio-jole mirandarrarekin batera, eta Madrilen egin berri den Espainiako Gazte Musikarien lehiaketan aurreneko saria lortu dute pasa den asteburuan, Ganbera Musika sailean.
Madrilgo Goi Mailako Musika Kontserbatorio Realeko Manuel de Falla Auditorioan jo du hirukoteak, eta lehiaketa egin den 40 urte hauetako parte-hartze haundiena izan da bertan. Denera, aurkeztutako taldeen artean 13 aukeratu zituen epaimahaiak Madrilen, zuzeneko sailkapen saioetan jotzeko, eta sei pasa ziren finalera. Horien artean gailendu da Trio Zukan.
Txistua, akordeoia eta perkusioa, musika garaikidea egiten
Hirukote berezia osatzen du Trio Zukan deitutakoak, normalean elkartuta entzuten ez diren hiru musika-tresna uztartuta osatu baitute taldea.
Donostiako Musikene Goi Mailako Musika Ikastegian ezagutu zuten elkar, eta 2014an osatu zuten taldea. Aurreneko diskoa, berriz, pasa den martxoan aurkeztu berri dute: Soinuzko Begiradak. Toma 1. Gehiago egiteko prest dauden seinale.
Eta, hain zuzen, aurreran-tzean lanik ez dute faltako. Izan ere, diskoaren aurkezpenean aitortu bezala, musika tresnen formazio berezi honetarako «ikerketa eta sorkuntza bultzatzea» izan dute beti helburu, hasiera horretan ez baitzegoen hirurek musika garaikidea egiteko aukera haundirik. Horrela, hainbat proiektutan mugilduta dabiltza, eta diziplina ezberdinak nahastuta Begirada Anitzak proiektua ere jarri dute martxan. Era berean, jasotako sariari esker, estatuan barrena lau kontzertu bira emango dituzte.