ilarrak hartu ohi du protagonismo osoa maiatzero, duela zortzi urte, eta aurten ere, halaxe izango da. Baratze elkarteak Udalaren babesarekin antolatuta, hurrengo astean, maiatzaren 16tik 19ra bitarte egingo dute VIII. Ilar Eguna. Astiko merkatari, ostalari eta zerbitzuen elkarteak ere jarriko du bere hondar-alea.
Azoka Berezia, igandean
Ostegunean emango zaio hasiera Ilar Eguneko egitarauari, ilar pintxopotearekin. Herriko tabernetan izango da, eta gaueko 21:30etan ilar-pintxo onenari saria emango diote.
Hurrengo egunean, ostiralean, baratzeetara bisita egingo dute Herri Eskolako eta inguruko ikastetxeetako ikasleek, 09:00etan hasita.
Eta gauza bera egingo dute helduek larunbatean, hilaren 18an; goizeko 11:00etan abiatuko da txangoa, udaletxetik.
Egun haundia, aldiz, igandean izango da. Ilar Azoka Berezia izango baita Joseba Barandiaran plazan, ohi bezala. Ilar postuak jarriko dituzte bertan, eta bertan, Luis Irizar eskolako hiru sukaldarik egindako ilar-pintxoak dastatzeko aukera izango da, baita Euskal Herri osoko produktuak erosteko aukera ere.
Horrez gain, haziari eta landareari buruzko tailerra ere izango da Hazieraren es-kutik, eta haurrentzat, hazi eta landareekin photocall-a jarriko du Idoia Lizeagak.
100 bale Astiko elkarteak, etzitik
Egun horretan pintxoak eskuratzeko, baleak banatuko ditu astelehenetik aurrera, Astiko merkatari, ostalari eta zerbitzuen elkarteak.
Denera, 100 bale banatuko dituzte etzi hasi eta ostiralera bitarte, Astigarragako hamaika saltokik, haien bezeroen artean. Horiek dira: Astigarraga Consultores, Lorza Aholkularitza, Mapfre Astigarraga, Pastain Irudi Zerbitzuak, Lur Jostuna, Ezpela Natur Denda, Farmazia Maria Aguado, Arantxa Ileapaindegia, Ibai Lur jatetxea, Kako jatetxea eta Rezola Sagardotegia.