Emanaldi berezia izango da bihar, arratsaldeko 19:00etan Biterin. Hedatuz proiektuaren barruan, laburmetraiak jarriko dituzte, lau elkarteren lana ezagutzera emateko: Bizibide, Bihotzez, AGISAS eta AGIAC.
Atzo aurkeztu zuten, Hernaniko udaletxean, Xabi Lertxundi Zerbitzu Sozialetako presidenteak, eta elkarteetako ordezkariek: Alejandro Cadenas eta Julen Ulanga (AGISASeko presidentea eta koordinatzailea), Angela Sir (Bizibide), Mari Jose Alkorta (AGIAC), eta Saray Arozena (Bihotzezeko psikologoa).
Elkarteetako kideak eta boluntarioak, protagonista
Lau film labur izango dira: El vuelo de las mariposas; Inténtalo, todo es posible; Tocados por el corazón; eta La familia, lo primero. Horietan, elkarteetako kideak eta boluntarioak dira protagonista, eta filmetako bitan, Oscar Terol eta Alazne Etxeberria aktoreek ere kolaboratu dute.
Lau filmez gain, Bihotzez eta AGIAC elkarteei buruzko erreportajeak ere jarriko dituzte. Guztietan, euskerazko azpitituluak eta gorrentzako keinu hizkuntza txertatu dituzte.
Garrantzitsua da, biharko emanaldira joateko ez ematea koloniarik, perfumerik, loziorik edo antzekorik.
«Etorri filmak ikustera; ezagutzera ematen ez badugu, ez dauka zentzurik»
Cadenasek, proiektuaren dinamizatzaileak, jakinarazi zuen «egunerokoan gaixotasun hauen eraginak jasaten dituzten horiek» direla laburmetraien protagonista: «erakutsi nahi dugu, zein zailtasun dituzten sozializatzeko. Eskertu nahi dugu boluntarioek egin duten lan guztia, eta baita Terol eta Etxeberria aktoreen kolaborazioa ere. Eta eskertu nahi diegu, modu berean, bihar filmak ikustera gerturatuko direnei. Etorri daitezela herritarrak; bestela, ezagutzera ematen ez badugu, ez dauka zentzurik lan honek guztiak».
Lertxundik, bere aldetik, elkarte horien lana goraipatu zuen: «ez gara gaixotasun horietaz kontziente, etxean tokatzen zaizkigun arte. Hernaniar guztiak gonbidatu nahi ditugu emanaldira, oso garrantzitsua baita. Medikuen lana baloratzen dugu, baina kontziente izan behar dugu, gaixoek sozializaziorako dauzkaten arazoez».
Biharko saiorako, koloniak, lozioak... ez emateko deia
Saioa doakoa eta irekia izango da, aretoa bete arte. Baina bertaratuko direnei, eskatu diete ez emateko koloniarik, perfumerik, loziorik edo usaina daukan beste produkturik. Izan ere, sentsibilitate kimiko anitza daukaten pertsonak egongo dira bertan, eta arazo larriak eragiten dizkie.
Gipuzkoako fibromialgia eta neke kroniko sindromearen elkartea da Bizibide; kardiopatiak dituzten haurren familien elkartea Bihotzez; Gipuzkoako antikoagulatuen elkartea AGIAC; eta gizarte integratzaile gizarte eta kultur animatzaileen elkartea AGISAS. Guztiek emango dute bihar, modu zabalagoan, egiten duten lanaren berri.