Mahai gainean jarriko dute gaur, Jai Batzordeak antolatuta, Hernanin eztabaida pizten duen gaietako bat: festetan animaliak erabiltzeari buruz, mahai ingurua egingo dute, arratsaldeko 19:00etan Biterin. Eztabaida horretan, parte hartuko dute bi ikuspegi nagusietako defendatzaileek: Askekintza talde antiespezistak, eta Sokamuturra Bai taldeak. Jon Odriozola ariko da moderatzaile lanetan.
«Jaietako hiru ekintza garrantzitsuenetakoa da sokamuturra, herriarentzat»
Sokamuturra Bai taldetik, nabarmendu dute, «jaietako hiru ekintza garrantzitsuenetakoa» dela sokamuturra, «guretzat eta, uste dugu, baita herriarentzat ere. Plaza betetzen du, eta gure kulturaren eta tradizioaren parte da». Azaldu du, gainera, ez dutela sokamuturra bakarrik defendatuko; baita animaliak erabiltzen dituzten beste zenbait ekintza ere, «Euskal Jaietako azokak, edota Portuko asto karrerak bezala. Ez baitugu uste animalien sufrimendua eragiten dutenik».
Era berean, uste dute, antiespezistek lortzen badute bizirik dauden animalien erabilpena kentzea, «hildakoekin» sartuko direla: «pentsatzen dugu, beraiei inpaktantea egingo zaiela axeri buru bat edo maskuriak ikustea. Hori ere defendatzea dagokigu».
«Herri gisa, lotsagarria da tradizioaren izenenean praktika hauek onartzea»
Askekintzak, berriz, adierazi du animaliak «beraien interesen kontra» erabiltzen direla Hernaniko jaietan, animaliak presente dauden ekintzetan, «norberaren dibertsioa soilik» hartuta kontuan. «Jakinda beste animaliek, guk bezala, aske bizi eta errespeta daitezen nahi dutela, uste dugu ekitaldi horiek eraldatu egin behar ditugula. Herri gisa, lotsagarria da tradizioaren izenean horrelako praktikak onartu eta, gure pribilegioak erabiliz, gizakiok beste animaliak esplotatzea. Gure herriak aurrerapauso ugari eman ditu, jendarte justuago bat sortzearen alde; eta uste dugu, orain ordua dela festetako animalien erabilerari aurre egiteko», diote.
Mahai ingurura gonbidatu dituzte herritar guztiak, «gure jarrera ulertu eta proposamenak egiteko, festa inklusibo eta justuago batzuen alde».