Hernaniko airearen kalitatearekin kezkatuta, bilerak egiten hasi zen herritar talde bat, Arnasten dugun airea hitzalditik abiatuta. Hain justu, beste hitzaldi bat antolatu dute biharko, arratsaldeko 19:00etan Biterin, eta Mattin Aldaia Ingurumen zinegotziak eskainiko du. Izan ere, hitzaldiaren helburua da, azaltzea airearen kalitateari buruzko ikerketaren txostenak jasotzen duena, baina «modu ulergarriagoan».
Kataluniako Unibertsitate Politeknikoak egin zuen ikerketa, Hernaniko Udalak eskatuta. Ikerketaren emaitzak eta txostena, martxoan jakinarazi zituzten, eta www.hernani.eus webgunean daude ikusgai. Baina Hernani Aire Garbia taldetik diote, «oso luzea eta ulertzeko zaila» dela; horregatik eskatu zioten hitzaldia eskaintzea, Ingurumen zinegotziari.
Herritar guztiei, gonbitea
Saioa irekia izango da, eta gaiarekin kezka duten herritar guztiak gonbidatu dituzte, «gure helburuak lortzeko».