Aste Santuko etenaldiak ez die onik egin boleibol taldekoei. Asteburuan infantiletako neskek bakarrik jokatu dute, eta lider jarraituko dute, baina Tolosako Laskorain Elduayenen kontra 1-3 galduta. Liga bukatzeko falta diren hiru partiduetan, aurreko dinamikari heldu eta txapeldun titulua lortzea dute helburu.
Akatsek eragindako porrota
Aurrekoa errepikatu nahi ez zutela-eta, Tolosakoek indarrean hasi zuten partidua, aurrekoan 0 eta 3 galdu baitzuten Hernaniren aurrean. Hernani, berriz, zalantzekin hasi zen. Horrela, aurreneko jokoa 12-25 galdu zuen, akats dezente eginda.
Bigarren jokoa berdinduagoa izan zen, baina, hala ere, 21-25 irabazi zuen Tolosak.
Hirugarren jokoan bai, etxekoak hobeto aritu ziren, eta partidua borrokatzeko egoeran egongo zirela zirudien, 25-19 irabazita. Baina laugarren jokoan, berriro ere akatsen eraginez, 22-25 galdu zuen Hernanik, eta beraz, 1-3 nagusitu zen Tolosa, partiduan.
Dena den, sailkapen orokorreko aurreneko postuan jarraitzen du Hernanik, nahiz eta Summa 2 taldea puntu bakarrera duen. Geratzen diren partiduetan, beraz, ligako erritmoa berreskuratzea izango du giltza, eta Summa 2ren aurkako partidua, haiek eskatuta atzeratu zena, erabakigarria izango da.