Astigarragako Berdintasunerako II. Plana osatu dute Udaleko Berdintasun Sailak, Emakundek eta Elhuyar Aholkularitzak. Eta orain, prozesua jarriko dute martxan, planaren ebaluazioa egiteko, eta Astigarragako egoeraren diagnostikoa berritzeko, berdintasunaren arloari dagokionean.
Prozesu horren baitan, gaur egingo dute aurreneko saioa, herritar guztiei irekia. Udaletxeko pleno aretoan izango da, arratsaldeko 19:00etan.
«Garrantzitsua da herritar eta eragile guztien partehartzea»
Nabarmendu dute, «garrantzitsua» dela, «herritar eta eragile guztien partehartzea, ikuspuntu anitzak jaso eta guztien iritziak ezagutzeko», eta horregatik, guztiei luzatu diete gonbitea, bertaratzeko: «prozesua aurrera eramateko, ezinbestekoa da informazioa iturri ezberdinetatik jasotzea, herriko ahalik eta argazki errealena eta osatuena eskuratzeko, etorkizuneko lanaren oinarri sendoa izango dena», azaldu dute.
Izan ere, ebaluazio lanak ez ezik, herriaren beharrak identifikatzen ere jarriko dute fokua, prozesu honetan.