Koxka elkarteak gonbidatuta, Hernanin izango dira bihar, Telmo Irureta eta Fernando Vera. Robarte una noche film laburreko protagonistetako bat da Irureta, Miren Ibargurenekin batean, eta filmeko zuzendaria da Vera. Garun paralisia daukan aktorea da Irureta, eta istorio honetan ere ezaugarri hori azaleratuko da.
Leo eta Anaren artean ezustean sortzen den harremanaren berri ematen da, hain zuzen, Robarte una noche laburrean, eta zuzendariak berak aipatutakoaren araberan, «besteen gainetik edo azpitik jartzera bultzatzen gaituen horri ihes» egiteko modua azaleratuko da.
Biterin ikusi ahal izango da, arratsaldeko 19:00etan, eta solasaldia izango da segidan beraiekin. Kaxko elkarteak jakinarazi duenez, solasaldia elebietan eta zeinu hizkuntzan egingo da, eta aldi bereko itzulpen zerbitzua izango da.
Lapurreta baten bitartez egiten dute topo istorioko protagonistek, baina haien artean sortzen den harremana berezia da. Zergatik?
Bien arteko harremana berezia da, hasteko, bai batak eta baita besteak ere, bestearengandik zerbait behar dutelako, baina, batez ere, ez dutelako bestea epaitzen. Anak behar duena da norbaitek entzun dezan. Susmorik ez du Leok zer eskatuko dion trukean.
«Batzuetan, inork eskatzen ez dizkigun betebeharrak jartzen dizkiogu gure buruari»
Zer aukeratu zenuen lehendabizi; gaia, ala aktoreak?
Miren Ibarguren eta Telmo Iruretarekin egin dut lan beste film labur batzuetan, zuzendaritza taldeko kide izan direnetan, eta biekin maitemindu nintzen. Aktore zoragarriak dira, eta bi pertsona oso dibertigarri. Istorio hau beraientzat idatzi nuen.
?Ahulagoa? den horrekiko harremanetan, baldintzatuta sentitzen gara?
Orokorrean, gure heziketaren ondorioz besteen aurrean amore ematera ohituta gaude, besteak epaitzera ohituta, alderaketak egitera... Honek guztiak baldintzatzen gaitu, besteen gainetik edo azpitik jartzera bultzatzen gaitu. Horri guztiari ihes egin nahi nion film labur hau idatzi nuenean, kritikatu. Uste dut sentimendu horiek ez garamatzatela inora, eta pertsonarengandik urruntzen gaituztela.
Ez ote da norberak daukan konplexua, benetan baldintzatzen gaituen hori?
Ez dakit konplexua den. Zalantzarik gabe, denok saiatzen gara gauzak ezkutatzen. Xelebrea da; ezkutuan gordetzen saiatzen garen horiek argitara ateratzen ditugunean, utzi egiten diote ezkutuan genituenean gure kontzientzian zeukaten pisua edukitzeari. Batzuetan, inork eskatzen ez dizkigun betebeharrak jartzen dizkiogu gure buruari, eta behar ez ditugun ?bastoietan? bilatzen dugu babesa. Horri buruz ari da Robarte una noche.
Nork bere mugak non dituen onartzen ere jakin behar izaten dela esaten da. Beti?
Mugak izatea gizakiaren ezaugarria da, ezin dugu dena egin. Hasieratik mugatzen gaitu gure gorputzak. Baina ulertu behar da, baita ere, muga horiek hainbat maila dauzkatela. Nik ezin dut maratoi bat egin, baina horrek ez nau mugatzen ariketa egiteko.
Proiekzioaren ondoren solasaldia izango da. Erantzunak ikusi ondoren, zein esango zenuke harritzen dela gehiago; publikoa ala zuek?
Neretzako Robarte una noche esperientzia zoragarria da, taldean sortu zen klimagatik, publikoak egiten dion harrera onagatik... Jaialdi askotan mugitzen ari gara, eta film laburra ikusten duen jendearen iritziak jasotzea oso polita da. Asko gustatzen ari zait nola ari den jendearekin konektatzen, ulertzea nondik idatzita dagoen. Gai gogorra da, baina badago umorea ere, eta ezintasunari zuzenean begiratzen zaio, baina horizontalean.
Sari bat baino gehiago jaso duzue dagoeneko. Bada baten bat, besteak baino bereziagoa?
Hamabost saritik gora jaso ditugu aurten. Nik badaramakit denbora bat film laburrak egiten, eta ez dago formularik. Jaialdi bakoitzean ehundaka lan jasotzen dira, lan oso onak. Jaialdi batek zure lana aukeratzea lorpen haundia da, bere horretan, eta epaimahai batek saritzea, are gehiago. Ilusio haundia egin zidan aurrenekoak, Telmo eta Mirenen interpretazioa saritzen zuenak.
Zein ibilbide izango du ?Robarte una noche? film labur honek aurrerantzean?
Robarte una noche jaialdi gehiagotan izango da. Datozen egunetan ikusi ahal izango da Valentzian, Leonen, Galician edota nazioarteko bestelako jaialdietan; Zipren, adibidez. Niretzako garrantzitsuena da jende askorengana iristea. yy