Iheslarien ibilbideen hirugarren mendi martxa egingo da Mendibe-Cizetik Otsagabiara ekainaren 29a eta 30ean. Euskal Pirinioak Askatasun Bideak elkarteak mendi martxa omenaldi berri bat antolatu du aurreko bi ekitaldien arrakastaren haritik tiraka.
Ibiltari bezala edo ez, mendi martxa historiko omenaldi honetan parte hartzeko, EPABarekin erregistratu behar da lehenik. Informazioaren orria eta izenematearen orria eskatu daitezke dagoeneko basquefreedomtrailsww2@gmail.com helbidean eta EPAB ezagutzeko ondorengo web gunea erabili daiteke: www.bpftaww2.com
Aurtengo askatasun bidea Burdintxuruketa lepotik (Mendibe-Cize, Nafarroa Beherean) Otsagabiara izango da eta hirugarren ibilaldia da.
Bob Frost hegazkinlari beteranoa zendu zen martxoan
Pasa den martxoaren 14an Bob Frost hegazkinlaria hil zen 95 urterekin eta Bigarren Mundu Gerlan Comete iheserako frantziar-belgikar sareak ihes egiten lagundu zuen, 1942ko irailean naziek haren hegazkina lurrera bota ondotik. Parisa lehenik, handik Donibane Lohizunera, ondotik Madril eta Gibraltar zeharkatuz, urte bereko urrian Ingalaterrara iristeko.
EPABen esanetan «Frostek beti azpimarratu nahi izan zuen erresistentzia zibilaren laguntza. Zentzu horretan, Euskal Herrian egin izan diren omenaldietan parte hartu izan zuen, euskaldunei eskerrak emateko, bertan hainbat sarek jardun baitzuten nazien aurkako borrokan».