Amaitu berri dute Astigarragako Emakumeen eta Gizonen Berdintasunerako II. Plana; eta orain, prozesua jarri dute martxan, planaren ebaluazioa egiteko, eta udalerriaren egoeraren diagnostikoa berritzeko.
Berdintasun Sailak eta Elhuyar Aholkularitzak abiatu dute prozesua, Emakunderekin elkarlanean; eta datorren asteartean izango du aurreneko saio irekia, maiatzaren 7an. Udaletxeko pleno aretoan egingo dute, arratsaldeko 19:00etan hasita.
Saio horretan, orain arteko ekintza eta lanak ebaluatzeaz gain, herriaren beharrak zein diren identifikatzen saiatuko dira, aurreratu dutenez. Eta jakinarazi dute, «ezinbestekoa» dela informazioa iturri ezberdinetatik jasotzea, prozesua aurrera eraman ahal izateko.
Horregatik, gonbitea luzatu diete herritar guztiei, astearteko saio horretara gerturatzeko: «herritar eta eragile guztien partehartzea garrantzitsua da, ikuspuntu anitzak jasotzeko, eta guztien iritziak ezagutzeko aukera izateko».