Partidu garrantzitsuak jokatuko dituzte, asteburu honetan, Urumea bailarako esku pelotariek. Astigartarren kasuan, Berria Txapelketakoa da zita nagusia, bihar: final zortzirena jokatuko du Mundarrok, Doneztebeko Erreka taldearen kontra; eta etxean ariko dira, Txomiñene frontoian, 17:00etan hasita.
Jokatuko dutenak dira, final hamaseirenetan Lizarrako San Migueli nagusitu zitzaizkion sei pelotariak: Eñaut eta Ekain Lizeaga anaiak kadeteetan; Axel Larrañaga eta Ganix Urdangarin jubeniletan; eta Harri Loidi eta Jokin Santxez nagusietan.
Errekarekin ariko da, aldiz, bailarako beste pelotari bat: Iker Salaberria goizuetarra. Nagusietan jokatuko du, Mariezkurrenarekin; eta kinielen arabera, partidu hori izango da erabakigarria. Mundarro da faborito kadeteetan, baina Errekaren alde daude aurreikuspenak, jubeniletan. Nagusietan, berriz, bikote beteranoa dira astigartarrak, txapela asko jantzitakoak; eta gazteak Errekakoak, Salaberria punta-puntan dabilela. Ikusgarria izan daiteke, beraz, azkeneko partidu hori.
Oier Garaiarrek, finala bihar
Hernaniarren kasuan, Oier Garaiarrek dauka zita garrantzitsuena, bihar goizeko 11:30etan, Amaiurren: Udaberri Torneoko finala jokatuko du, Zestoako Xabat Sasiainekin, Oiarpeko Etxeberria eta Olaizen kontra. Partidu berdindua espero da.
Bestalde, asteburu honetan emango diote hasiera, Hernaniko kiroldegiko frontoian, errendimenduko San Joan Torneoari. Arratsaldeko 15:00etan hasita, 13 partidu jokatuko dira gaur. Guztira, pelota eskolako 62 pelotarik hartuko dute parte: 28 benjaminetan, 16 alebinetan, eta 18 infantiletan. Binaka ariko dira benjamin eta alebinak, eta banaka lau t?erdian infantilak, azpi astetan zehar.