Hernaniko Udalak onartu egin zuen, Hernanin Zero Zaborrek aurkeztu zuen mozioa. Bertan eskatzen zen, Hernanin hondakin organikoak, «hernaniarron esku egotea. Erabat logikoa da Hernaniko Udalak eraikitzea urtean 2.000 tona organiko konpostatuko lukeen planta. Udalari eskatzen diogu irmo eutsi diezaiola bere asmoari; eta Gipuzkoako Foru Aldundiari, berriz, bere erabakia alda dezala, konplost planta eraikitzeko baimena ukatu ondoren», adierazi zuten taldeko ordezkariek. Udal Gobernu taldeak eta Orain Hernanik aldeko botoak eman zituzten, hamar guztira, eta aurka agertu ziren EAJ eta PSE-EEren lau ordezkariak.
Andoni Amonarraiz alderdi jeltzaleko bozeramailearen hitzetan, «hondakinen kudeaketa ez da Udalaren eskuduntza». Bestetik, ez du ulertzen Udala zergatik ez den San Markoseko Komunitatetik irten, gehiengoa edukita azken bi legealdietan. PSE-EEko bozeramaile den Ricardo Crespok, bide beretik jo zuen, ezezkoa arrazoitzeko.
Pistaren egokitzapena, kultur ekitaldiaterako
Gainerako gaien artean, kreditu gehigarriaren aldaketaren alde Udal Gobernuak bozkatu zuen, eta oposizioa aurka agertu zen, bost botorekin. Hernaniko Udalak 3,7 milioiko gerakina izan du 2018an, eta diru horrekin ekingo diren proiektuak azaldu zituen Luis Intxauspe alkateak. Besteak beste, kiroldegiko lehenengo pistaren egokitzapena nabarmendu zuen, kultur ekitaldiak bertan egin ahal izateko. Frontoia ere margotuko da, ibilgailu elektrikoa erosiko da, eta Santa Barbarako harrobiaren poriektura ere bideratuko da dirua. «Batzuk 2019ko aurrekontura inkorporatuko dira, eta besteak 2020kora».
Amonarraizek ez zuen begi onez ikusi proposamena: «inbertsioen %26a bakarrik gastatu duzue, eta hurrengo korporazioari esaten diozue non gastatu behar duen. Proposamenen %9a bakarrik egin eta ordaindu dituzue». Crespok eta Orain Hernaniko Jaione Aristregik, Udalaren kudeaketa kaxkarra azpimarratu zuten, ezezkoa argudiatzerakoan. «Ez du konfiantzarik ematen», gaineratu zuen Crespok.