HELPBIDEAREN berri zuzenean jakiteko bilera eginen da Aranoko eta Goizuetako Udaletxeetan bihar. Aranon 17:30etan eta Goizuetan 19:30etan eginen dira. Baserritar edo etxebizitza sakabanuetako jabe edo bizilagunak etortzea komenigarria da guztiz.
Zer da Helpbidea? Larrialdi baten aurrean larrialdi zerbitzuei irisgarritasuna errazteko sistema da.
Nafarroako Gobernua (Suhiltzaileak, Osasun Saila, Foruzaingoa, Babes Zibila eta Informatika) eta Tracasa enpresa publikoarekin elkarlanean aritu dira sakabanatutako etxebizitza hauek lokalizatzeko modu egoki baten bila. Horrela ondorioztatu dute, arazo honi aurre egiteko modurik onena, etxebizitza bakoitzarentzat Helpbidea izeneko identifikatzaile bat erabiltzea dela, hau da, zonaldeko edozein eraikuntzari nolabaiteko NAN zenbaki bat egokitzea. Helpbidea identifikatzailea ez da denboran zehar aldatuko, eta larrialdi zerbitzuek ezagutzen dute.
Baserri eta etxe urrundu bakoitzean plaka identifikatzailea
Goizeta eta Aranoko Udalek, identifikatzaile hauek lortu eta Nafarroako Gobernuaren laguntzaz, plaka batzuk egin dituzte beren herrietako baserri eta etxebizitza sakabanatuetan jartzeko. Etxebizitza bakoitzean, bere identifikatzailea eramango duen plaka jarri beharko da, hortaz, Udalak ezarriko duen irizpidea jarraituz, beti ere leku ageriko batean, larrialdi zerbitzuek hauek ikusi ahal izango dituzten eran.
112 zenbakira deitu eta kodea jakinarazi
Herritarrek, 112ra deitzearekin, kode hau jakinarazteko ohitura hartu beharko dute hemendik aurrera, euren larrialdia jakinarazterakoan. Kode hau gertukoei ere jakinaraztea gomendatzen da, larrialdia sufritzen ari den horren ordez, 112ra ingurukoek deitu beharko balute ere.
Larrialdi zerbitzuek izan duten hutsunea arintzeko
Honekin orain arte baserri sakabanatuak aurkitzeko larrialdi zerbitzuek izandako hutsuneak edo ezinak arintzea da bilatzen den onura. «Ea hala den eta ea denok erabiltzera ohitzen garen gure helpbidea kodea» diote Udaletako arduradunek.
«Leku zoragarriak dira bizitzeko, baina, paisai horren barruan, gure baserriak mendietan modu sakabanatuan egoteak baditu eragozpenak ere, larrialdi egoeretan esaterako».