Joan den asteburuan jokatu da, Galizian, Espainiako Batel Txapelketa. Eta Hernaniko batelik izan ez bada ere, bi hernaniar bueltatu dira banderarekin, garaipen haundia lortuta: Xabat Pastor arraunlariak eta Jon Iruretagoiena patroiak, irabazi egin dute Donostiarraren batelarekin, gizonezko absolutuen mailan.
Bosteko batela osatu dute bi hernaniarrek, Ioritz Orbegozo, Endika Alberdi eta Beñat Eizagirre taldekideekin batera. Larunbateko sailkatze estropadetan finalerako txartela lortu, eta igandean hiru dezimako aldearekin lortu zuten garaipena, Itsasoko Amaren aurretik.
Hernaniko Arraun Elkarteak, biak zoriondu nahi izan ditu, garaipen horrengatik. Taldearen harrobikoa da Pastor, infantiletatik jubeniletara bertan aritutakoa, Donostiarrara saltoa eman aurretik. Iruretagoiena, Urkiren harrobikoa izan arren, Hernanin gazteen entrenatzaile izan zen bi urtez.