Bi hilabete baino gutxiago geratzen da aurtengo San Joanetarako, eta dagoeneko badaukate kartel iragarlea. Hain justu, Miren Saenz de Urturi Erice hernaniarrak diseinatutakoa izango da, herritarren botoei esker. Izan ere, hernaniarren artean egindako bozketan garaile izan da, 292 botorekin.
604 herritarrek, botoa
Denera hamaika proposamen jaso zituzten aurtengo San Joan jaiak iragartzeko, eta horietatik lau aukeratu zituen San Joan Jai Batzordeak, azken urteetan bezalaxe.
Lau kartel horiek herritarren esku jarri zituen Udalak apirilaren hasieran, eta horien artean izan da hautatua Saenz de Urturiren kartela.
604 herritarrek eman dute botoa guztira; 473 boto jaso dira web orriaren bidez (%78), eta 131, aldiz, Biterin bertan paperean (%22).
292 boto jaso ditu kartel irabazleak; 166, bigarren aukerak; 76, lehenengo aukerak; eta 70, hirugarrenak.
Hori horrela, oinarrietan jaso bezala, 600 euro jasoko ditu irabazleak, horietatik 300 euro, Berriak elkarteko dendetan erosteko.