Aurten ere, lehentasunezko mezenasgo jarduera izendatu du Foru Aldundiak Dobera Euskara Elkartea, eta horri esker, 2018an ekarpena egin zuten bazkideek dedukzioa izango dute errenta aitorpenean; baita Kronikalariek ere. Emandako laguntzari dagokionaren %30 deduzitu ahal izango dute.
Datuak lehendik, dedukziorako
Orain egin behar den errenta aitorpena 2018ari dagokiona da. Beraz, 2018an egindako diru ekarpena hartuko da kontuan dedukzioa egiteko.
Horretarako, Dobera Euskara Elkarteak eta Kronikak bazkide eta laguntzaileen datuen berri eman behar izaten diote Foru Aldundiari, errenta aitorpena egiteko epea ireki baino lehen. Hau da, orain deduzitu ahal izateko, abendua baino lehen eman behar ziren ondorengo datu hauek: izena eta bi abizenak, NAN agirian idatzita agertzen diren moduan; NAN zenbakia; eta bertan agertzen den etxeko helbidea.
Aurten egindako diru ekarpenei dagokien errenta aitorpena 2020an egingo denez, 2019a bukatu baino lehen eman behar dira aipatutako datuak.
Autolikidazio proposamenak zuzenduta, interneten bakarrik
Aurtengo errenta aitorpeneko autolikidazio proposamenetan gaizki aplikatu du Aldundiak dedukzioa. Internet bidez jasotako proposamenetan zuzendu du dagoeneko, baina posta arrunt bidez jasotakoek proposamena moldatu beharko dute.