Juantxo Labaien Memorialak aurten 46garren edizioa du, bada zerbait, eta urtero bezala jubenilen txapelketa potentea antolatu du CD Hernaniko futbol sekzioak. Bere garaian Eguberrietan jokatzen zen, baina azken urteetan denboraldiaren amaieran jokatzen da. Honela, gaur ohorezko talde jubenila Labaien txapelketan lehiatuko da beste hiru talderekin batera. Eta ez dira nolanahiko klubak gainera, baizik eta Espainiako Ligetan punta puntan dabiltzan hiru talde; Eibar, Real Sociedad eta Zaragoza.
Hernani-Reala, 11:00etako lehenengo finalerdia
Goizeko 11:00etan emango diote hasiera txapelketari, Hernani eta Realaren arteko lehenengo finalerdietako norgehiagokarekin. Zati bakarreko partidua izango da. Ondoren, 12:00etan, Zaragoza eta Eibarrek jokatuko dute aurrez aurre, bigarren finalerdian.
Eguerdian, Txantxangorri elkartera joango dira jokalari eta teknikari guztiak. Elkarrekin bazkalduko dute bertan, ia 120 lagunek. Hau ere ohitura bihurtu da.
Behin indarrak hartuta arratsaldean jokatuko dituzte finala eta hirugarren eta laugarren posturako partidua. Beti ere Zubipen: 16:30etan, hirugarren eta laugarren postua jokatuko dute; eta 17:30etan izango da final haundia.
Sari-banaketan, bi finalistek saria jaso ondoren, Labaien familiak jokalari onena sarituko du. Aurreko urtean Realak irabazi zuen txapelketa, finalean Alaves 2-0 gainditu ondoren. Talde gasteiztarreko Ivan Alonso, izendatu zuten jokalari onena. Aurten ere, jokalari jubenil hoberenak ikusteko aukera egongo da.
Bihar, nesken etxeko agurra
Bestetik, nesken talde nagusiak, Zubipen jokatuko duten denboraldiko azken partidua dute bihar, 18:30etan, Goierri-Gorriren kontra. Hurrengo asteburuan amaituko dute denboraldia Derion. Biharkoa azkenaurreko jardunaldia da.