Lehenago ere antolatu dituzte Bapo Kantari saio gehiago, eta izandako arrakasta ikusita, aurtengorako zita ere jarri dute, maiatzaren 10erako. Seigarren edizioa izango da aurtengoa, eta Petritegi sagardotegian egingo da, iluntzeko 20:00etan hasita.
Afariarekin batera, musika
Azken urteetan bezala, aurten ere «ederki afaldu eta eztarria urratu arte kantari aritzeko» asmoa azaldu dute, antolatzaileek. Norberto Almandoz musika eskolako eta Astigarragako Herri Eskolako irakasle, ikasle eta guraso «saltsero» batzuk dira antolatzaileak, eta deialdia zabaldu diete, izena emateko, giro onean eta musikaren aitzakian afaltzeko gogoa duten guztiei.
Giro on hori jarriko dutenetako batzuk, antolatzaileez gain, Aitor Mendiluze eta Haritz Mujika izango dira, bertsotan ariko baitira.
Izen-ematea, irekita
Eguna eta ordua zehaztuta, txartelak salgai jarri dituztela ere jakinarazi dute. Petritegi Sagardotegian, Petrikafen eta 943 45 71 88 telefonoan lortu daitezke, 36 eurotan.
Musikarekin batera, afaritarako jarriko den menua sagardotegikoa izango da, baina arrainarekin, eta kafea eta kopa barne. Ondorengo «afalondoren luzea» ere, prezioaren barruan dagoela ziurtatu dute.