Gazte Plana idatziko du Astigarragako Udalak, Aztiker soziologia ikergunearen eskutik, jakinarazi duenez. Eta horretarako, «herriko gazteekin elkarlanean» ariko dira, «lan dinamika partehartzailea bideratuz».
Horrekin, «pauso bat gehiago» eman nahi du Udalak: «gazteei zuzendutako politiken inguruko hausnarketa burutu berri dugu. Egin dugu azken 30 urteotan eguneratu gabe egon den gazteen egoeraren diagnosia, eta otsailean aurkeztu genuen. Baina behin diagnosia eguneratuta dagoela, pauso bat haratago joateko prest dago Udala, eta Gazte Plana idazteari ekingo diogu», nabarmendu du.
Gazteek dauzkaten kezka eta erronkei «erantzun egokiak» ematea izango da helburua.
Udalak azaldu du, helburua dela Astigarragako gazteen «iritzi eta ekarpenak jasoko dituen plangintza» lantzea; alegia, Udalarekin elkarlanean, gazteek dauzkaten kezka eta erronkei «erantzun egokiak» ematea.
Hezkuntza baliabideak, lanerako prestakuntza eta etxebizitza aukerak, oinarri
Aurreratu dutenez, Udalaren baliabideei egokitutako plana izango da, eta zenbait epealdi zehaztuko dituzte, planak jasoko dituen ekintzak garatzeko. Horretarako, «instituzioen arteko elkarlana» bultzatuko dute, «administrazioaren esku dagoena» egin dadin, gazteen beharrak asetzeko. Zentzu horretan, hiru adin multzotan banatu dituzte gazteen beharrak: 12-18 urte, 18-24 urte, eta 24-35 urte.
Adin tarte bakoitzean, gazteek dauzkaten behar bereziei emango zaie erantzuna: herrian bertan hezkuntza baliabideak edukitzeari, lanerako prestakuntza berezia jasotzeari, eta etxebizitza aukerak bermatzeari, hain zuzen ere.
Horretarako, Aztiker ikergunearen eskutik, «talde lanerako espazioak» sortuko dituzte, «alde bakoitzaren interesen ikuspegi zehatzetik eta gai bakoitzaren inguruko ikuspegi desberdinak mahai gaineratuz, talde-komunitate-identitate ikuspegia kontutan hartuz», azaldu dute.