Urteko batzarra egin zuen, apirilaren 7an, Gipuzkoako Merkataritza Federazioak, Tolosako Topic museoan. Eta iazko balantzea eta aurtengo helburuak eta asmoak ezagutzera ematearekin batera, errekonozimendua egin nahi izan zieten, Gipuzkoako hainbat merkatariri.
Errekonozimendu hori jaso zuten denden artean, baziren Hernaniko bi denda: Oa gozotegia, eta Telemar etxetresna elektrikoen denda.
Singular Denda izendapena jaso zuen Oa gozotegiak, Gipuzkoako beste 19 dendarekin batera. Izendapen horrekin, nabarmendu nahi dute denda horiek duten originaltasuna eta autentikotasuna: «bertako dendak, geureak, bezeroarekin konprometituta daudenak; kultura propio batekin, detailearen kultura hain zuzen ere. Denda bereziak, bezeroa berezi sentiarazten dutenak», nabarmendu dute Gipuzkoako Merkataritza Federaziotik.
20 izendapen horiekin, dagoeneko 163 dira Singular Dendak, Oa tartean dela.
Telemarren 50 urteko ibilbideari, omenaldia
Eta batzarraren bukaeran, iritsi zen Hernaniko beste denda baten momentu berezia; «gure batzarretako une hunkigarrienetako bat izaten dena», adierazi dute Federaziotik. Momentu hori da, 50 urteko ibilbidea daramakiten dendei omenaldia, eta aurten, horien artean izan da Telemar, etxetresna elektrikoen denda hernaniarra, 1969an zabaldu zutena. Gipuzkoako beste lau dendarekin batera jaso zuen omenaldia.