Hastera doa Hernanirentzat, esku pelotako urteko torneo garrantzitsuenetako bat. Bihar egingo du debuta Berria Txapelketan, goizeko 11:00etan hasita, kiroldegiko frontoian. Eta aurrean, Ortuellako Danok Lagunak taldea izango du. Berdindua espero da kanporaketa.
Kadete mailan, hasteko, Xabier Apaolaza eta Unai Etxarri ariko dira, Perez eta Allenderen kontra; antzeko maila duten bi bikote. Jubeniletan, ondoren, Xabier Salaberriak eta Mikel Lasak jokatuko dute, Cortazar eta Aragonesen kontra. Partidu berdindua hori ere, kategoriako aurrelari onenetako birekin. Eta azkenik, nagusietan, Paul Ojuel eta Markel Lizeaga ariko dira Hernanirekin, Lopez Aldai eta Bilbaoren aurrean. Bikote hernaniarra da faborito, baina kontuz ibili beharko dute. Lesio luze batetik dator Lizeaga, eta Lopez Aldai beteranoak ez du aukera galtzen, partiduak irabazteko zirrikituren bat ikusten duenean.
Maila haundiko jaialdia, beraz, bihar goizean Hernanin jokatuko dena.
GRABNIan, zortzi hernaniar
Bestalde, ligaxkako azkeneko jardunaldia jokatuko dute asteburuan, GRABNI txapelketan. Eta Gipuzkoak deituta, Hernaniko zortzi pelotari ariko dira, Arabaren kontra: bost palaz, eta hiru eskuz.
Horrela, bost palistak jokatuko dute: ezker horman ariko da Amaia Irazustabarrena, eta trinketean Maider Huizi eta Ariane Arrieta nagusietan, eta Ekhiñe Balerdi eta Garazi Urdangarin jubeniletan.
Eskuz, berriz, trinketean ariko dira hiru hernaniar: 22 urtez azpikoetan Xabat Pagola eta Endika Arizmendi, eta jubeniletan Oihan Zugasti, Gaztelekuko Huitzirekin. Irabazi beharra daukate biek; 22 urtez azpikoek, 15 tantoko aldearekin. yy