Eguraldi onarekin, asko eta asko hasi dira dagoeneko udaran pentsatzen. Udararekin batera, eskutik helduta datoz, baita ere, haur eta gaztetxoen eskolako oporrak, eta horretarako, plan paregabea izaten dira udalekuak.
Aukera anitza dago Euskal Herrian zehar, baita Hernanin bertan ere. Horien artean daude urtero Dobera Euskara Elkarteak antolatzen dituen Udaleku Ibiltariak.
Bi txanda, adinaren arabera
Azkeneko urteetan bezalaxe, bi txanda antolatu dituzte uztailaren bigarren erdialdetik aurrera, eta adinaren arabera banatuta.
Udaleku Ibiltariei dagokien aurreneko txanda 2.004 eta 2.006 urte bitartean (biak barne) jaiotakoentzat izango da. Txanda hau, uztailaren 14tik 26ra bitarte burutuko da, hau da, 12 gau egingo dituzte gaztetxoek, herriz herri, Goierri eta Aralar mendien artean. Prezioa: bazkideek, 220 euro; gainontzekoek, 260 euro.
Goierri-Aralar eta Donostialdea-Oarsoaldea zeharkatuko dituzte, hurrenez hurren.
Bigarren txanda, aldiz, aurreneko txandakoak bueltan direnean egingo da. 2.007 eta 2.009 urte bitarteko gaztetxoentzat izango da, uztailaren 28an hasi eta abuztuaren 3ra arte luzatuko dena. Denera, sei gau pasako dituzte Gipuzkoan zehar, Donostialdea eta Oarsoaldea ezagutzen. Prezioa: bazkideek, 150 euro; gainontzekoek, 180 euro.
Izenematea, maiatzaren 24ra arte
Izena emateko epea irekita dago, eta maiatzaren 24ra arte izango da aukera Doberaren bulegoan (Larramendi 11), dobera@dobera.eus helbidean edo 943 33 27 99 telefonoan. Horretarako informazio osoa dakarren diptikoa banatu du Doberak herriko ikastetxeetan.