Tipi tapa, tipi tapa iritsiko da Korrika gaur gauean Urumea bailarara. Baina horren aurretik, eguna girotuko dute txikienek eta nagusienek, Hernanin eta Astigarragan. Goizueta eta Aranoko gaztetxoak, aldiz, bihar aterako dira "Korrika".
Eskolen txanda, aurrena
Modalitate guztietan gozatu ahal izango da Korrikaz, gaur. Hernaniko Haur Eskolako neska-mutilak izango dira goiztiarrenak;?goizeko 10:15etan abiatuko da Mikrokorrika haien eskolatik.
Ondoren, Hernanin, goizeko 11:00etan hasiko da Korrika Txikia atletismo pista ingurutik, eta Plazan emango diote bukaera, lekukoa herriko eskoletako ikasleen eskuetatik pasa ondoren. Bertan hartuko dute parte, baita ere, Ereñotzuko Txirrita Eskolako gaztetxoek.
Orduerdi beranduago, 11:30etan, izango da Korrika Txikia Astigarragan. Ikastetxetik abiatuko dira Herri Eskolako ikasleak; handik Ergobia aldera joango dira, eta Kako ingurutik egingo dute buelta.
Korrika Gaztearekin emango zaio bukaera goizari. Eguerdiko 12:30etan abiatuko da Tellerigainetik eta Plazan bukatuko da.
Dinokorrikak, bigarren edizioa
Baina gaztetxoak ez dira protagonista bakarrak izango. Adinekoek ere izango dute beren Korrika propioa: Dinokorrika. 16:00etan hasita izango da, Sandiusterritik hasita. Handik, Urumea Herri Gunera joango dira;?Elkano kaletik Dorira, ondoren; Doritik, Caseriora eta Kixkalera, gero; Kale Nagusian gora egingo dute, Plazan bukatzeko.
Bertan, testu bat irakurriko du Maria Angeles Ibargurenek, azkeneko lekukoa eramango duenak, eta omenaldia egingo zaio Eulali Aranbururi.
Dinokorrika duela bi urte egin zen aurrenekoz Hernanin, «Frankismo garaian euskeraren alde sutsuki egin zuena» omentze aldera, eta aurten, Lezon ere egingo dute.
Musikak erritmoa, aurretik
Korrika iritsi aurretik, herria girotzeko asmoz, 18:00etan kontzertua eskainiko du Duo Jadek Tilosetan, eta ondoren, 19:30etan, Kilima taldeak.
Astigarragan, aldiz, Laiotz taldeak jarriko dio erritmoa Korrika iritsi aurretiko orduei, 19:30etan hasita Joseba Barandiaran plazan. Eta ondoren, 21:30etan, kantu-afaria egingo dute, leku berean. Korrika pasata ere, Laiotzek jarraituko du herria girotzen.
00:34etatik aurrera, Urumean
Ostirala pasata sartuko da Korrika Urumea bailaran, Perurenatik. 00:34etan hartuko dute aurreneko lekukoa astigartarrek, herriko AEKren eskutik, eta handik pixkanaka herrian sartzen hasiko da: Zarkumendegi pasako du, eta Gruas Zapiainetik sartuko da herrian. Tomas Alba zeharkatu, eta Urumea Berri pasata, Ergobiara joango da.
Handik, 01:12etan hartuko du lekukoa aurreneko hernaniarrak: Martindegi Auzo Elkarteak. Akarregitik jarraituko du ibilbideak, eta Zinkoeneatik behera egingo du, atletismo pista pasa eta Marielutsen sartu aurretik. Orduan sartuko da erdigunean aurreneko aldiz, Urbieta eta Txirrita kalea zeharkatuta. Lizeagara sartuko da gero, eta handik, Kaxkora. Kaxkoa zeharkatuta, Txantxillako rontondatik, Urnietarako bidea hartuko du.
Dobera-Kronikak, Larramenditik Plazara
Ohi bezala, Dobera-Kronikak bat egin du Korrikarekin, eta kilometro erdia egingo du gaurkoan. AEK-ren, Doberaren eta Kronikaren bulegoaren paretik hasi eta Plazaraino izango da, San Joan Konpartsarekin batera, 01:44ak aldera.
Goizuetan, Korrika Ttikia bihar goizean
Goizueta eta Aranotik ez da pasako Korrika, baina bihar goizean, Korrika Ttikia eginen dute goizuetarrek. 10:30etan izanen da izenematea, eta 11:00etan abiatuko dira, Plazatik.