Hernanin Zero Zabor eta Errausketaren Aurkako Mugimenduak antolatuta, eta Udalaren babesarekin, hitzaldia eskainiko du bihar Abel Arkenbout toxikologo holandarrak. ToxicoWatch fundazioko kidea eta sortzeileetako bat da bera: «ToxicoWhatch Gobernuz Kanpoko Erakunde bat da ikertzen dituena kutsagarrien eraginak ingurumenean, animalietan eta pertsonengan», azaldu dio berak Argia aldizkariari (CC-by-sa lizentziari esker Kronikara ekarria).
Dioxinak Harlingenen (Holanda) -Dioxinak Zubietatik? Honela kutsatzen dute erraustegi modernoenek izenburupean, Biterin izango da, 10:00etan.
«Errausketa ez da soluzioa»
Hernanin eskainiko duen hitzaldian helaraziko duena ere aurreratzen dio Argiari: «hondakinena arazo haundietakoa da mundu osoan. Errausketa ez da soluzioa. Aldiz, bide alternatibo bat ari dira garatzen, Zero Zabor eredua. Ekonomikoa da beste arazo haundia. Errausketa bezalako hondakin kudeaketa batek diru asko sortzen du jende kopuru txiki batentzako. Nire gomendioa da gobernuarekin lan egitea ahalik eta ikerketa objektiboenak bideratu ahal izateko».
Eta horretarako, aholkatzen du: «neurketak jarraian egitea, markagailu biologikoekin lan egitea, beharbada giza odolarekin? eta konbentzitu behar duzue gobernua erraustegia irteerarik gabeko bidea dela. ToxicoWatchen ikerketek erakutsi dute erraustegi moderno batek ere sortzen dituela izugarri toxikoak diren kutsagarri iraunkorrak, bat ere produzitu ezin dituenak. Gure planeta bakar hau babestu behar dugu».
Omrinen, ikerketak
Gertutik ezagutzen duen gaia baita erraustegiena; 2011n jarri zuten martxan Omrin erraustegia Herlingenen, bere herrian. Eta ikerketak egin zituen ToxicoWatchek 2013an: «inguruetako oilategi txikietako arrautzetan aurkitu genituen dioxina kontzentrazio haundiegiak, CALUX bioteknologia berrizalea erabiliz. Ondoren Gobernuak egindako kontra-ikerketak gure aurkikuntzak berretsi zituen. Ondorioz, zenbait azterlan gehiago burutu ziren dioxinen iturriak identifikatzeko. Horietako garrantzizkoenetako bat izan zen tximinietako gasen epe luzeko laginketa AMESA teknikarekin. Honek oso argi erakutsi zuen erraustegia dela dioxinen iturri nabarmen bat, batik bat itzali ostean berriro pizteko uneetan, dioxinen emisioan ordu gutxi batzuetan gaindituz 6 urte osoko emisio normalak», kontatu dio Argiari.
Elkarrizketa osoa irakurtzeko, egin klik hemen: https://www.argia.eus/argia-astekaria/2640/abel-arkenbout-toxicowatch-erraustegi-mondernoenek-ere-dioxinak-isurtzen-dituzte-hala-erakutsi-dugu-holandan