Bi ekitaldi antolatu dira gaurko Herri Eskolan; batetik, DBHren aldeko mugimenduak antolatuta, 16:30etan sormen tailerrak egingo dira haurrei zuzenduta, eta bestetik, Guraso elkarteak antolatuta, Amaia Vazquez psikologoak hitzaldia emango du familia barruko komunikazioaren inguruan, 18:30etan hasita eskolako areto nagusian.
Gometxak, margoak edota idatziak, DBH amesteko
Pentsamenduen txokoa jarriko du martxan DBHren aldeko mugimenduak patioan, 16:30etan. Etorkizunera bide eginez, Astigarragan hazi, Astigarragan hezi lelopean, haurrek aukera izango dute marraztu, idatzi edota gometxekin sormena lantzeko, edota beste sorpresa batzuekin jolasteko.
Helburua izango da nolako DBH nahi duten lantzea, eta haurrek ere iritzia emateko tartea izatea. Era berean, lagundu nahi zaie ulertzen zergatik egiten ari diren gurasoak hainbat bilera.
Dagoneko, bi bilera egin dituzte gurasoek, Astigarraga DBH mugimenduaren barruan, herriak DBH ahalik eta azkarren izan dezan lan egiteko.
Hitzaldia Vazquezek, komunikazioaz
Gaurko beste zita Herri Eskolako Guraso elkarteak antolatutako hitzaldia da. Amaia Vazquez psikologoa gonbidatu dute, 18:30etan, ikastolako areto nagusira.
Oraingoan, familia barruko komunikazioaz ariko da; hain zuzen, guraso eta seme-alaben artekoari buruz.