Kontzertua emango du Maite Larburu hernaniarrak gaur, 20:00etan Biterin. Hezurren azpian diskoa aurkeztuko du, eta oholtza gainean lagun izango ditu Carlos Taroncher, klarinete baxuan, eta Aida Torres eta Beñat Iturrioz hernaniarrak hainbat perkusio tresnarekin. Sarrerak 7,5 euroan erosi daitezke.
Exera buelta, hirugarrenean
Hirugarren disko hau du bakarkako aurrenekoa, Maite Larburu musikari hernaniarrak. Aurreko biak, Hau eta Ura patrikan, Neighbor bikotea osatzen duen Josh Cheathamekin argitaratu ditu; Amsterdamen aurrenekoa, eta Amsterdam eta Euskal Herriaren artean bigarrena.
Hirugarren hau, berriz, Hezurren azpian, bakarkako aurrenekoa du, eta «bueltako diskoa» dela aitortu du biolin-jole eta musikariak. «Bakarrik noraino iritsi» zitekeen jakiteko «erronka» ere izan da, eta ahotsaz gain, hainbat musika tresnarekin ere esperimentatzekoa, eta biolinarekin beste alderdi bat lantzekoa. «Biolinarekin lortu dut Neighbor-en mundu horretara, Maite Larbururen beste mundu horretara, kantagintzara gerturatzea».