Europako bost ikastetxetako ikasleekin batera, Suediako Avesta hirian izan dira martxo bukaeran, Hernani LHIIko Oinarrizko Lanbide Heziketako lau ikasle eta bi irakasle. Erasmus+ (Mathematics Revisited) programan ari dira parte hartzen, eta bi urtetan zehar, matematikak ardatz izango dituen proiektua garatzen ari dira, artea eta literaturarekin uztartuta.
Proiektua garatzeko hainbat bidaia eta bisita dauzkate antolatuta, eta horietako bat izan da egin berri duten hau. Bigarren mailako zati teorikoa landu dute bertan, praktiken aldia hasi aurretik.
Europako sei herrialdetako ikasleak, elkarlanean
Suediako egonaldi honetan, ikasle hernaniarrak beste bost herrialdetako ikasleekin elkartu dira: Austria, Grezia, Errumania, Malta eta Suediakoekin, hain zuzen.
Bost egunetan zehar, aukera izan dute proiektua garatzeko egindako ekintzak plazaratu eta elkarbanatzeko, eta era berean, kultura eta jende ezberdina ezagutu dute. Horrela, matematikekin lotutako ekintzez gain, aukera izan dute bertako ondare kulturala ezagutzeko, eta baita hainbat kirol praktikatzeko ere.
«Esperientzia aberasgarria»
Duela sei hilabete hasi ziren proiektua garatzen, eta bidaia hau «egindako lanak dakarren saria» izan da, LHIIko irakasleen esanetan. Era berean, azaldu dute «esperientzia erabat aberasgarria» izan dela, eta «lanean jarraitzeko motibazioa» daukatela ikasleek.
Ate irekiak, gaur
Behin etxera itzulita, lanean jarraitzeko garaia ere bada, eta ikasle berriei begira ere ari da prestatzen Hernani LHII.
Horrela, gaur arratsaldeko 18:00etan ate irekiak egingo dira, Hernaniko Lanbide Heziketako Karmelo Labaka eraikinean, datorren ikasturteari begira zein ikasketa aukera dauden ezagutzeko, eta bertako materiala gertutik ezagutu ahal izateko.